ఆయుర్వేదానికి దీవి గోపాలాచార్యులు సేవలు చిరస్మరణీయం

ఆయుర్వేదానికి  దీవి గోపాలాచార్యుల సేవలు చిరస్మరణీయం

-ఘనంగా 135వ జయంతి వేడుకలు అవనిగడ్డ మేజర్ న్యూస్ దేశవ్యాప్తంగా ఆయుర్వేద వైద్యాభివృద్ధికి దీవి గోపాలాచార్యులు చేసిన సేవలు చిరస్మరణీయమని నియోజకవర్గ యువనాయకులు మండలి వెంకట్రామ్ అన్నారు. నాగాయలంక మండలం భావదేవరపల్లిలో శనివారం దీవి గోపాలాచార్యుల 135వ జయంతి వేడుకలు ఘనంగా నిర్వహించారు. మాజీ సర్పంచ్ మండలి ఉదయ భాస్కర్ ఆధ్వర్యంలో జరిగిన ఈ కార్యక్రమంలో మండలి వెంకట్రామ్‌తో పాటు దీవి వంశీయులు గోపాలాచార్యుల విగ్రహానికి పూలమాలలు వేసి నివాళులర్పించారు.

ఈ సందర్భంగా మండలి వెంకట్రామ్ మాట్లాడుతూ భారతీయ సంప్రదాయ వైద్య పరిశోధకుడిగా, ఆయుర్వేద పండితుడిగా దీవి గోపాలాచార్యులు విశేష ఖ్యాతి గడించారని తెలిపారు. 1917లో అఖిల భారత ఆయుర్వేద విద్యాపీఠానికి అధ్యక్షత వహించి ఆయుర్వేద అభివృద్ధికి కృషి చేశారని పేర్కొన్నారు. ఆయన సేవలకు గుర్తింపుగా వైద్యరత్న, ఆయుర్వేద మార్తాండ, భిషగ్మణి వంటి బిరుదులు అందుకున్నారని వివరించారు. దేశవ్యాప్తంగా ఆయుర్వేద వైద్యాన్ని ప్రచారం చేసి, దాని విస్తృతికి విశేషంగా కృషి చేశారని కొనియాడారు. అంతటి ఖ్యాతి గడించిన మహనీయుడు దివిసీమకు చెందినవారు కావడం ఈ ప్రాంత ప్రజలకు గర్వకారణమన్నారు.

గోపాలాచార్యుల సేవలను భావితరాలకు తెలియజేయాలనే ఉద్దేశంతో గత ఏడాది ఎమ్మెల్యే మండలి బుద్ధప్రసాద్ వారి విగ్రహాన్ని ఏర్పాటు చేసినట్లు తెలిపారు.

కార్యక్రమంలో దీవి వంశీయులు దీవి రామకృష్ణమాచార్యులు, దీవి వేంకటేశ్వరకుమార్, దీవి సత్యప్రసాద్, పీఏసీఎస్‌ చైర్మన్లు ముమ్మారెడ్డి శ్రీనివాసరావు, తోట శ్రీనివాసరావు, కూటమి నాయకులు బండ్రెడ్డి హరి, భోగాది శివవిష్ణు, నీటి సంఘం అధ్యక్షుడు బండ్రెడ్డి నీలాంబరరావు, కూనపరెడ్డి నాగమల్లేశ్వరరావు, మాదివాడ అర్జునరావు, జనసైనికులు పాల్గొన్నారు. అజంతా శ్రీనివాస్ అవనిగడ్డ కృష్ణాజిల్లా