విద్యార్థుల్లో సృజనాత్మకతకు ప్రోత్సాహం.. సేవా సంకల్ప అభియాన్‌లో పోటీలు
పూడూరు, మేజర్ న్యూస్: విద్యార్థుల్లో దాగి ఉన్న ప్రతిభను వెలికితీసి, వారిలో దేశభక్తి, సామాజిక స్పృహను పెంపొందించడమే లక్ష్యంగా సేవా సంకల్ప అభియాన్ ఆధ్వర్యంలో డ్రాయింగ్, వ్యాసరచన పోటీలు నిర్వహించారు. భారత ప్రధాని నరేంద్ర మోదీ జన్మదినాన్ని పురస్కరించుకుని చేపట్టిన సేవా సంకల్ప అభియాన్‌లో భాగంగా కంకల్ గ్రామంలోని జిల్లా పరిషత్ ఉన్నత పాఠశాల, మండల ప్రాథమిక పాఠశాల విద్యార్థులకు ఈ పోటీలు నిర్వహించారు. పోటీల్లో ప్రతిభ కనబరిచి ప్రథమ, ద్వితీయ స్థానాలు సాధించిన విద్యార్థులకు బహుమతులు అందజేశారు. ఈ కార్యక్రమానికి సేవా సంకల్ప అభియాన్ రాష్ట్ర కన్వీనర్ పెద్దింటి నవీన్ కుమార్, బీజేపీ జిల్లా మాజీ అధ్యక్షుడు సదానంద రెడ్డి, రవీందర్ కంకల్ ముఖ్య అతిథులుగా హాజరై విద్యార్థులకు బహుమతులు ప్రదానం చేశారు. ఈ సందర్భంగా వారు మాట్లాడుతూ…. విద్యార్థులు చదువుతో పాటు కళలు, సృజనాత్మక రంగాల్లోనూ ఆసక్తి కనబరచాలని, ఇలాంటి పోటీలు వారిలో ఆత్మవిశ్వాసాన్ని పెంపొందించడంతో పాటు దాగి ఉన్న నైపుణ్యాలను వెలికితీస్తాయని అన్నారు. భావిభారత పౌరులుగా ఎదుగుతూ దేశాభివృద్ధిలో భాగస్వాములు కావాలని ఆకాంక్షించారు. ప్రధాని జన్మదిన వేడుకలను సేవా కార్యక్రమాల రూపంలో నిర్వహించడమే సేవా సంకల్ప అభియాన్ ప్రధాన ఉద్దేశమని పేర్కొన్నారు. ఈ కార్యక్రమంలో పాఠశాల ప్రధానోపాధ్యాయురాలు పుష్ప, కన్నయ్యల రాజు, మనోహర్ గౌడ్, ఆంజనేయులు, నర్సింలు, ఉపాధ్యాయులు, విద్యార్థులు తదితరులు పాల్గొన్నారు.
