వీరబ్రహ్మేంద్ర స్వామి విగ్రహ ధ్వంసం దుర్మార్గమైన చర్య, దోషులను కఠినంగా శిక్షించాలి

సూర్య నస్పూర్ : మెదక్ జిల్లా నర్సాపూర్ మండలం చింతగుంట గ్రామంలో శ్రీశ్రీశ్రీ పోతులూరి వీరబ్రహ్మేంద్ర స్వామి విగ్రహాన్ని గుర్తుతెలియని దుండగులు ధ్వంసం చేయడాన్ని తీవ్రంగా ఖండిస్తున్నామని అఖిల భారతీయ విశ్వకర్మ మహాసభ మంచిర్యాల జిల్లా ప్రధాన కార్యదర్శి మునిగంటి శ్రీనివాస్ చారి అన్నారు. గురువారం నస్పూర్ శ్రీరాంపూర్ ప్రెస్‌క్లబ్‌లో నిర్వహించిన విలేకరుల సమావేశంలో ఆయన మాట్లాడుతూ, మహాసభ రాష్ట్ర అధ్యక్ష కార్యదర్శుల  సూచనల మేరకు జిల్లా, మండల స్థాయిలో నిరసన కార్యక్రమాలు చేపడుతున్నట్లు తెలిపారు. కాలజ్ఞానకర్తగా, సంఘ సంస్కర్తగా, జగద్గురువుగా విశ్వప్రసిద్ధి చెందిన వీరబ్రహ్మేంద్ర స్వామి విగ్రహాన్ని ధ్వంసం చేయడం విశ్వబ్రాహ్మణులతో పాటు సమస్త హిందువుల మనోభావాలను దెబ్బతీసే హేయమైన చర్యగా అభివర్ణించారు. ఈ ఘటనకు పాల్పడిన దుండగులను ప్రభుత్వం, ఉన్నతాధికారులు వెంటనే గుర్తించి అరెస్టు చేసి కఠినంగా శిక్షించాలని డిమాండ్ చేశారు. భవిష్యత్తులో ఇలాంటి ఘటనలు పునరావృతం కాకుండా తగిన చర్యలు తీసుకోవాలని కోరారు. ఈ కార్యక్రమంలో రాష్ట్ర కార్యదర్శి కర్ణకంటి నర్సింహాచారి, జిల్లా వర్కింగ్ ప్రెసిడెంట్ తెలికుంట్ల రాజాచారి, జిల్లా ఆర్గనైజింగ్ సెక్రటరీ కొండపర్తి రామ్మోహన్ చారి, బీసీ సమాజ్ ఉమ్మడి ఆదిలాబాద్ జిల్లా అధ్యక్షుడు నరెడ్ల శ్రీనివాస్, పలువురు నాయకులు పాల్గొన్నారు.