ఉపాధ్యాయుల సమస్యలను ప్రభుత్వం వెంటనే పరిష్కరించాలి – పీఆర్‌టీయూ టీఎస్ జిల్లా అధ్యక్షుడు ఆడే ప్రకాష్

సూర్య జైనూర్: సిర్పూర్ (యు) మండలంలోని ఉపాధ్యాయులు, సమగ్ర శిక్ష ( స్ స్ ఏ ) ఉద్యోగులు ఎదుర్కొంటున్న సమస్యలను ప్రభుత్వం వెంటనే పరిష్కరించాలని పీఆర్‌టీయూ టీఎస్ కుమురం భీం ఆసిఫాబాద్ జిల్లా అధ్యక్షుడు ఆడే ప్రకాష్ డిమాండ్ చేశారు.ఈ సందర్భంగా ఆయన మాట్లాడుతూ.. జూలై 2023 నుంచి పెండింగ్‌లో ఉన్న వేతన సవరణను వెంటనే అమలు చేయాలని, కేజీబీవీ సీఆర్‌టీ ఉపాధ్యాయులకు వేసవి సెలవుల కాలానికి వేతనాలు కట్ చేయకుండా చెల్లించాలని కోరారు. కేజీబీవీ, ఎంఆర్‌సీ సిబ్బందికి హెల్త్ కార్డులు వర్తింపజేయడంతో పాటు పెండింగ్ బిల్లులను మంజూరు చేయాలని విజ్ఞప్తి చేశారు.అలాగే వర్క్ అడ్జస్ట్మెంట్‌ను విద్యార్థుల సంఖ్య ఆధారంగా చేపట్టాలని, గతంలో నిర్వహించిన వర్క్ అడ్జస్ట్మెంట్‌ను సవరించాలని, సర్వీసులో ఉన్న ఉపాధ్యాయులకు టెట్ నుంచి మినహాయింపు ఇవ్వాలని డిమాండ్ చేశారు. సీపీఎస్ ఉద్యోగులకు పాత పెన్షన్ విధానాన్ని అమలు చేయాలని, సమగ్ర శిక్ష కేజీబీవీ ఉపాధ్యాయులకు మినిమం టైమ్ స్కేల్ ప్రకటించాలని కోరారు.మహిళా ఉపాధ్యాయులకు తమకు అనుకూలమైన వారంలో ఒక రోజు వీక్లీ ఆఫ్ వినియోగించుకునే అవకాశం కల్పించాలని, గత ఏడాది సమ్మె కాలానికి వేతనాలు చెల్లించాలని, పాఠశాలల ప్రారంభ సమయాన్ని ఉదయం 9:30 గంటలుగా నిర్ణయించాలని ప్రభుత్వాన్ని కోరారు.ఈ కార్యక్రమంలో మండల అధ్యక్షుడు ఈ. భూమన్న, రాష్ట్ర ఉపాధ్యక్షుడు ప్రాథోడ్ శ్రీనివాస్, జిల్లా ఉపాధ్యక్షుడు ఆత్రం దత్తు తదితరులు పాల్గొన్నారు.