TUWJ (IJU) వికారాబాద్ జిల్లా అధ్యక్షునిగా కొత్తపల్లి శ్రీధర్ ఏకగ్రీవ ఎన్నిక

వికారాబాద్, మేజర్ న్యూస్: తెలంగాణ రాష్ట్ర వర్కింగ్ జర్నలిస్టుల సంఘం (TUWJ–IJU) వికారాబాద్ జిల్లా అధ్యక్షునిగా కొత్తపల్లి శ్రీధర్ ఏకగ్రీవంగా ఎన్నికయ్యారు. ఈ సందర్భంగా ఆయన మాట్లాడుతూ... జిల్లాలోని జర్నలిస్టుల సంక్షేమం, హక్కుల పరిరక్షణ, సమస్యల పరిష్కారమే ప్రధాన అజెండాగా పనిచేస్తానని తెలిపారు. జర్నలిస్టులందరినీ కలుపుకొని ఐక్యతతో ముందుకు సాగుతూ వారి అభ్యున్నతికి నిరంతరం కృషి చేస్తానని పేర్కొన్నారు.జిల్లా కేంద్రంలో జర్నలిస్టుల కోసం ప్రత్యేకంగా యూనియన్ కార్యాలయాన్ని ఏర్పాటు చేసి, వివిధ మండలాల నుంచి వచ్చే జర్నలిస్టులకు అవసరమైన సౌకర్యాలు కల్పిస్తానని హామీ ఇచ్చారు. జిల్లాలోని అన్ని మండలాలకు చెందిన అర్హులైన జర్నలిస్టులకు ఆయా నియోజకవర్గాల ఎమ్మెల్యేలతో చర్చించి ఇళ్ల స్థలాలు మంజూరయ్యేలా కృషి చేస్తానన్నారు. అర్హులైన జర్నలిస్టులకు ఇందిరమ్మ ఇళ్ల పథకం ద్వారా లబ్ధి చేకూరేలా ప్రభుత్వ పెద్దలు, ప్రజాప్రతినిధుల దృష్టికి సమస్యలను తీసుకెళ్తానని తెలిపారు.జర్నలిస్టుల ఆరోగ్య భద్రతకు ప్రాధాన్యతనిస్తూ పోస్టల్ శాఖ ద్వారా హెల్త్ ఇన్సూరెన్స్ పాలసీలు అందేలా కృషి చేస్తానని వెల్లడించారు. వృత్తిపరమైన విధుల నిర్వహణలో ఎదురయ్యే సమస్యలతో పాటు వ్యక్తిగత ఇబ్బందుల్లోనూ జర్నలిస్టులకు అండగా నిలుస్తానని భరోసా ఇచ్చారు. జిల్లాలో ఏ జర్నలిస్టుకు ఎలాంటి సమస్య ఎదురైనా తన దృష్టికి తీసుకువస్తే పరిష్కారానికి కృషి చేస్తానని స్పష్టం చేశారు.జర్నలిస్టుల హక్కుల సాధన, సంక్షేమం, ఐక్యత కోసం అందరినీ కలుపుకొని పనిచేస్తానని కొత్తపల్లి శ్రీధర్ తెలిపారు.