ట్రాఫిక్ నియంత్రణకు అఖిలపక్ష సమావేశం
ట్రాఫిక్ నియంత్రణకు అఖిలపక్ష సమావేశం
నేరేడుచర్ల మేజర్ న్యూస్
నేరేడుచర్ల మున్సిపాలిటీ పరిధిలో జరుగుతున్న రోడ్డు ప్రమాదాలు, పెరుగుతున్న ట్రాఫిక్ సమస్యలను పరిష్కరించడానికి మంగళవారం మున్సిపాలిటీ కార్యాలయంలో మున్సిపాలిటీ చైర్మన్ కొణతం వెంకట రెడ్డి అధ్యక్షతన అఖిలపక్ష సమావేశం నిర్వహించారు.
ఈ సమావేశంలో వైస్ చైర్మన్ నూకల సందీప్ కుమార్ రెడ్డి, కౌన్సిలర్లు, కో-ఆప్షన్ సభ్యులు, వివిధ రాజకీయ పార్టీల నాయకులు, ప్రజాప్రతినిధులు, వ్యాపార సంఘాల ప్రతినిధులు, సంబంధిత అధికారులు కమిషనర్ చెన్నబోయిన నాగరాజు, నేరేడుచర్ల ఎస్సై సిహెచ్.గోపాల్ రెడ్డి, తహశీల్దార్ సురిగి సైదులు, హైవే ఎఈ పాల్గొని మాట్లాడుతూ పట్టణంలోని ప్రధాన రహదారులు, కూడళ్లు, మార్కెట్ ప్రాంతాల్లో నెలకొన్న ట్రాఫిక్ సమస్యలపై చర్చించారు.
ఈ సందర్భంగా ట్రాఫిక్ సమస్యల పరిష్కారానికి పలు సూచనలు చేశారు. ప్రధాన రహదారులపై వాహనాల పార్కింగ్ క్రమబద్ధీకరణ, రహదారులపై ఆక్రమణల తొలగింపు, పాదచారులకు ఇబ్బందులు కలగకుండా చర్యలు తీసుకోవాలన్నారు. ట్రాఫిక్ నిబంధనలపై ప్రజలకు అవగాహన కల్పించాలని సూచించారు.
పట్టణ అభివృద్ధి, ప్రజల సౌకర్యం, రహదారి భద్రత దృష్ట్యా అన్ని రాజకీయ పార్టీలు, వ్యాపారులు, ప్రజలు సమన్వయంతో సహకరించాలని కోరారు.
ట్రాఫిక్ నియంత్రణ అనేది కేవలం అధికారుల బాధ్యత మాత్రమే కాదు, ప్రతి పౌరుడి బాధ్యత అని అన్నారు. ప్రజలందరూ ట్రాఫిక్ నిబంధనలు పాటిస్తూ పట్టణ అభివృద్ధికి సహకరించాలని కోరారు.