telangana
స్వచ్ఛమైన నీటిని తాగాలి.. నీటిని పొదుపుగా వినియోగించాలి: సర్పంచ్ సువర్ణ ప్రభాకర్ రెడ్డి
దారూర్, మేజర్ న్యూస్: గ్రామ ప్రజలు ఆరోగ్య పరిరక్షణ కోసం స్వచ్ఛమైన నీటిని మాత్రమే తాగాలని, నీటిని వృథా చేయకుండా పొదుపుగా వినియోగించాలని అంతారం గ్రామ సర్పంచ్ సువర్ణ ప్రభాకర్ రెడ్డి సూచించారు. గురువారం దారూర్ మండల పరిధిలోని అంతారం గ్రామ పంచాయతీ కార్యాలయంలో సర్పంచ్ ఆధ్వర్యంలో జల మాహోత్సవం నిర్వహించారు.ఈ సందర్భంగా సర్పంచ్ మాట్లాడుతూ కలుషిత నీటిని తాగడం వల్ల అనారోగ్య సమస్యలు తలెత్తే అవకాశం ఉందని, ప్రతి ఒక్కరూ తాగునీటి విషయంలో తగిన జాగ్రత్తలు పాటించాలని తెలిపారు. సురక్షితమైన, స్వచ్ఛమైన నీటిని వినియోగించడం ద్వారా ఆరోగ్యాన్ని కాపాడుకోవచ్చని పేర్కొన్నారు.ప్రస్తుత పరిస్థితుల్లో ప్రభుత్వం సూచించిన విధంగా నీటిని పొదుపుగా వినియోగించాలని, ఎల్‌నినో ప్రభావం నేపథ్యంలో నీటి కొరత ఏర్పడకుండా గ్రామ ప్రజలందరూ సమష్టిగా బాధ్యతతో వ్యవహరించాలని కోరారు. అవసరమైన మేరకే నీటిని వినియోగిస్తూ ప్రతి నీటి చుక్కను సంరక్షించాలని పిలుపునిచ్చారు. నీటి సంరక్షణలో ప్రతి ఒక్కరూ భాగస్వాములై భవిష్యత్తు అవసరాల కోసం నీటిని కాపాడుకోవాలని సూచించారు. ఈ కార్యక్రమంలో గ్రామస్తులు తదితరులు పాల్గొన్నారు.
