సుల్తాన్‌పూర్‌లో జాబ్ జాతర..! ఫాక్స్‌కాన్‌లో ఉద్యోగాలకు 1,000 మంది యువత పోటీ
సంగారెడ్డి ప్రతినిధి ; తెలంగాణ రాష్ట్ర వైద్య, ఆరోగ్య శాఖ మంత్రి దామోదర్ రాజనర్సింహ ఆదివారం జేఎన్టీయూ సుల్తాన్‌పూర్‌లోని ఆడిటోరియంలో నిర్వహించిన జాబ్ మేళాను ప్రారంభించారు.ఈ సందర్భంగా జాబ్ మేళాకు హాజరైన నిరుద్యోగ యువతను ఉద్దేశించి మంత్రి ప్రసంగించారు. విద్యతో పాటు నైపుణ్యాభివృద్ధిని (స్కిల్ డెవలప్‌మెంట్) పెంపొందించుకోవాలని మంత్రి యువతకు పిలుపునిచ్చారు. తెలంగాణ రాష్ట్రంలో పెట్టుబడులు పెట్టేందుకు పలు అంతర్జాతీయ స్థాయి సంస్థలు ముందుకు వస్తున్నాయని, కార్పొరేట్ సంస్థలకు అవసరమైన నైపుణ్యం కలిగిన మానవ వనరులు రాష్ట్రంలో పుష్కలంగా ఉన్నాయని పేర్కొన్నారు.ఫాక్స్‌కాన్ ఎలక్ట్రానిక్ దిగ్గజ సంస్థలో ఉద్యోగ అవకాశాల కల్పన లక్ష్యంగా SKSS ఏజెన్సీ సహకారంతో నిర్వహించిన ఈ జాబ్ మేళాను నిరుద్యోగ యువత సద్వినియోగం చేసుకోవాలని మంత్రి కోరారు.ఈ జాబ్ మేళాలో సుమారు 1,000 మంది నిరుద్యోగ యువతీ, యువకులు తమ పేర్లను నమోదు చేసుకున్నారు.జాబ్ మేళా నిర్వహణకు సహకరించిన సంస్థ ప్రతినిధులను మంత్రి అభినందించారు. యువతకు ఉపాధి అవకాశాలు కల్పించేందుకు ఇటువంటి కార్యక్రమాలు ఎంతో ఉపయోగకరమని పేర్కొన్నారు.
