ఫిట్‌నెస్ సీక్రెట్స్, డైట్ ప్లాన్ పంచుకున్న దుల్కర్ సల్మాన్.. భావోద్వేగాలపై ఆసక్తికర వ్యాఖ్యలు
సూర్య ఎంటర్‌టైన్‌మెంట్ డెస్క్: తెరపై ఎప్పుడూ స్టైలిష్ లుక్, ఆకట్టుకునే ఫిట్‌నెస్‌తో మెప్పించే ప్రముఖ నటుడు దుల్కర్ సల్మాన్ తన ఆరోగ్య రహస్యాలు, ఆహారపు అలవాట్లు, వ్యక్తిగత భావోద్వేగాలపై ఆసక్తికర విషయాలను పంచుకున్నారు. ఆకాశంలో ఒక తార చిత్రంతో ప్రేక్షకుల ముందుకు వస్తున్న దుల్కర్, తన ఫిట్‌నెస్ మంత్రాన్ని వివరించారు. షూటింగ్ ఉన్నా లేకపోయినా ప్రతిరోజూ వ్యాయామానికి తప్పనిసరిగా సమయం కేటాయిస్తానని, కార్డియో, వెయిట్ ట్రైనింగ్ తన దినచర్యలో భాగమని తెలిపారు. ముఖ్యంగా లెగ్ వర్కవుట్స్‌తో పాటు అప్పర్ బాడీ కండరాలను టోన్ చేసుకునే వ్యాయామాలపై దృష్టి పెడతానని, తాను నటించే పాత్రలకు తగినట్లుగా ఫిట్‌నెస్ లక్ష్యాలను మార్చుకుంటానని స్పష్టం చేశారు.
శారీరక దృఢత్వంతో పాటు మానసిక ప్రశాంతత కూడా అంతే ముఖ్యమని దుల్కర్ సల్మాన్ పేర్కొన్నారు. బిజీ షెడ్యూల్‌లో ఒత్తిడిని అధిగమించేందుకు యోగా, మెడిటేషన్ చేస్తానని చెప్పారు. నిద్ర లోపం వల్ల కూడా ఒత్తిడి కలుగుతుందనే ఉద్దేశంతో ప్రతిరోజూ ఏడు నుంచి ఎనిమిది గంటల పాటు నిద్రపోతానని వివరించారు. మగవారు ఏడవకూడదనే భావనను తాను వ్యతిరేకిస్తానని, ఏడవడం వల్ల ఒత్తిడి చాలా వరకు తగ్గి యంగ్‌గా కనిపిస్తామని ఆసక్తికరంగా వ్యాఖ్యానించారు. తాను చాలా సున్నిత మనస్కుడినని, తాను నిర్మించిన ఒక సినిమా పరాజయం పాలైనప్పుడు అలాగే తన కూతురు జన్మించినప్పుడు సంతోషంతో కన్నీళ్లు పెట్టుకున్న సందర్భాలను గుర్తు చేసుకున్నారు.
ఆహారపు అలవాట్ల గురించి మాట్లాడుతూ తన రోజు కప్పు కాఫీతో మొదలవుతుందని, అల్పాహారంలో ఇడ్లీ, అవకాడో, గుడ్లు తీసుకుంటానని దుల్కర్ తెలిపారు. మధ్యాహ్నం, రాత్రి భోజనంలో ప్రొటీన్, కార్బోహైడ్రేట్లు సమతూకంగా ఉండేలా చూసుకుంటానని, వ్యాయామానికి ముందు అరటిపండు తిని, అనంతరం ప్రొటీన్ షేక్ తాగుతానని చెప్పారు. శరీరాన్ని హైడ్రేటెడ్‌గా ఉంచుకోవడానికి ఎప్పుడూ వాటర్ బాటిల్ వెంట ఉంచుకుంటానని పేర్కొన్నారు.
వారంలో ఒకటి లేదా రెండు రోజులు చీట్ డైట్ పాటిస్తూ తనకు ఇష్టమైన ఆహారాన్ని ఆస్వాదిస్తానని దుల్కర్ సల్మాన్ వెల్లడించారు. బిర్యానీ అంటే ఎంతో ఇష్టమని, అమ్మ చేసే తలశ్శేరి బిర్యానీ, ఫిష్ బిర్యానీ తింటుంటే ఎంతో సంతృప్తిగా ఉంటుందని చెప్పారు. మలయాళ వంటకాలైన పత్రిపై కొబ్బరిపాలు పోసుకుని చికెన్, మటన్ కర్రీతో తినడం తనకు ఇష్టమని తెలిపారు. 2020 లాక్‌డౌన్ సమయంలో జిమ్‌లు మూతపడినప్పుడు ఇంట్లోనే వ్యాయామం చేయాలనే సందేశంతో ట్రైనింగ్ డన్ ఛాలెంజ్ ప్రారంభించి, రానా, కాజల్ అగర్వాల్, అదితి రావు హైదరీ వంటి సహనటులను ఆహ్వానించిన విషయాన్ని దుల్కర్ గుర్తు చేసుకున్నారు.
Also Read: విడాకుల పుకార్లకు రమ్యకృష్ణ చెక్.. కృష్ణవంశీతో విడివిడిగా ఉండటంపై ఆసక్తికర వివరణ
