సోనియా గాంధీ ఆత్మకథ ఆధారంగా తెలుగులో సినిమా

హైదరాబాద్ :కాంగ్రెస్ అగ్రనేత సోనియా గాంధీ రాసిన ఆత్మకథ ‘బీలాంగింగ్: ఏ జర్నీ ఆఫ్ లవ్’ పుస్తకాన్ని ఆధారంగా చేసుకుని తెలుగులో ఒక చిత్రాన్ని తెరకెక్కించనున్నట్లు తెలంగాణ పీసీసీ కార్యనిర్వాహక అధ్యక్షుడు, మాజీ ఎమ్మెల్యే టి. జగ్గారెడ్డి ప్రకటించారు. సంగారెడ్డిలో నిర్వహించిన కాంగ్రెస్ నాయకులు, కార్యకర్తల సమావేశంలో మాట్లాడిన ఆయన, ఈ సినిమా నిర్మాణానికి సంబంధించిన వివరాలను వెల్లడించారు. ఇందిరా గాంధీ కోడలిగా, రాజీవ్ గాంధీ భార్యగా, రాహుల్-ప్రియాంకలకు తల్లిగా సోనియా గాంధీ సాగించిన జీవిత ప్రయాణాన్ని, ఆమె ఎదుర్కొన్న సవాళ్లను మరియు చేసిన త్యాగాలను ఈ సినిమా ద్వారా ప్రజల్లోకి బలంగా తీసుకెళ్తామని ఆయన తెలిపారు. సోనియా గాంధీకి ప్రధాని కుర్చీపై ఎలాంటి వ్యామోహం లేదని, భర్త రాజీవ్ గాంధీ మరణానంతరం ప్రధాని అయ్యే అవకాశం ఉన్నప్పటికీ పీవీ నరసింహారావును, ఆ తర్వాత యూపీఏ హయాంలో డాక్టర్ మన్మోహన్ సింగ్‌ను ప్రధానమంత్రిగా ఎంపిక చేసిన ఘనత ఆమె త్యాగానికి నిదర్శనమని కొనియాడారు. ఈ సినిమా నిర్మాణానికి సంగారెడ్డి నియోజకవర్గానికి చెందిన కాంగ్రెస్ నాయకులు, కార్యకర్తలే నిధులు సమకూరుస్తారని, త్వరలోనే 50 మంది సభ్యులతో ఒక ప్రత్యేక కమిటీని ఏర్పాటు చేసి నిర్మాణ ప్రక్రియను వేగవంతం చేస్తామని చెప్పారు. ముఖ్యమంత్రి ఎ. రేవంత్ రెడ్డి, టీపీసీసీ అధ్యక్షుడు బి. మహేష్ కుమార్ గౌడ్ చేతుల మీదుగా ఈ సినిమా షూటింగ్‌ను అధికారికంగా ప్రారంభిస్తామని జగ్గారెడ్డి వెల్లడించారు.