telangana
సీఎం సోదరుల అండదండలతోనే అక్రమాలు
హైదరాబాద్:హైదరాబాద్‌లోని అయ్యప్ప సొసైటీ భూముల్లో జరుగుతున్న అక్రమ రిజిస్ట్రేషన్లు, నిర్మాణాలపై బీఆర్‌ఎస్ (టీఆర్ఎస్) నేత కల్వకుంట్ల కవిత తీవ్ర ఆరోపణలు చేశారు. ముఖ్యమంత్రి సోదరుల అండదండలతోనే ఇక్కడ అక్రమ దందాలు సాగుతున్నాయని ఆమె మండిపడ్డారు. వివాదాస్పద స్థలాల్లో ఇళ్లు కొనుగోలు చేసి సామాన్య ప్రజలు ఆర్థికంగా నష్టపోవద్దని ఈ సందర్భంగా ఆమె సూచించారు.
కాంగ్రెస్ ప్రభుత్వం అధికారంలోకి వచ్చిన నాటి నుంచి అయ్యప్ప సొసైటీ పరిధిలో దాదాపు 750 అక్రమ నిర్మాణాలు వెలిశాయని కవిత ఆరోపించారు. ఈ అక్రమాలపై ప్రభుత్వం తక్షణమే స్పందించి నెల రోజుల్లోగా సమగ్ర సర్వే నిర్వహించాలని డిమాండ్ చేశారు. ప్రత్యేకించి సర్వే నంబర్లు 11/18 నుంచి 11/44 వరకు భారీ స్థాయిలో అక్రమ నిర్మాణాలు జరిగాయని, వాటిలో ప్రముఖ విద్యాసంస్థల భవనాలు కూడా ఉన్నాయని ఆమె వెల్లడించారు.
రాష్ట్రంలో టీడీఆర్ (TDR) అక్రమ దందాలు తప్ప ప్రభుత్వానికి వేరే ఏమీ కనిపించడం లేదని కవిత ఎద్దేవా చేశారు. ఇన్ని అక్రమాలు జరుగుతున్నా సైబరాబాద్ మున్సిపల్ కమిషనర్ ఎందుకు స్పందించడం లేదని, చర్యలు తీసుకోకుండా ఎందుకు మౌనంగా ఉన్నారని ఆమె నిలదీశారు.
