సర్వే విభాగం ఆధునికీకరణకు శ్రీకారం

సూర్య, మందమర్రి : సింగరేణి మందమర్రి ఏరియాలో సాంకేతిక పరిజ్ఞానాన్ని మరింత విస్తృతంగా వినియోగించుకునే దిశగా మరో ముందడుగు పడింది. ఏరియా జనరల్ మేనేజర్ కార్యాలయంలోని సర్వే విభాగంలో నూతనంగా ఏర్పాటు చేసిన అధునాతన హై-ఎండ్ కంప్యూటర్లను గురువారం ఏరియా జీఎం ఎన్. రాధాకృష్ణ లాంఛనంగా ప్రారంభించారు. ఈ సందర్భంగా ఆయన మాట్లాడుతూ.. గనుల నిర్వహణ, బొగ్గు ఉత్పత్తి కార్యకలాపాల్లో సర్వే విభాగం కీలక పాత్ర పోషిస్తుందని పేర్కొన్నారు. ఈ విభాగానికి ఆధునిక సాంకేతికతతో కూడిన కంప్యూటర్లు అందుబాటులోకి రావడం వల్ల సర్వేకు సంబంధించిన సమాచార విశ్లేషణ, మ్యాపింగ్‌తో పాటు వివిధ సాంకేతిక పనులను మరింత వేగంగా, కచ్చితత్వంతో నిర్వహించేందుకు అవకాశం కలుగుతుందని తెలిపారు. నూతన కంప్యూటర్ల వినియోగంతో సర్వే విభాగం పనితీరు మరింత మెరుగుపడుతుందని ఆశాభావం వ్యక్తం చేశారు. ఈ కార్యక్రమంలో కేకేఓసీపీ ప్రాజెక్ట్ ఆఫీసర్ రాంబాబు, డీజీఎం (సర్వే) ముఖ్య దేశాయ్, ఐటీ మేనేజర్ రవి, జూనియర్ సర్వే అధికారులు నరేష్, సదానందం, సర్వే విభాగం అధికారులు, సిబ్బంది పాల్గొన్నారు.