రోడ్డు ప్రమాద బాధితులకు సకాలంలో వైద్యం అందించాలి పీఎం రహత్ పథకాన్ని సమర్థవంతంగా అమలు చేయాలి. జిల్లా కలెక్టర్ హైమావతి

సిద్దిపేట, : రోడ్డు ప్రమాద బాధితులకు సకాలంలో వైద్య చికిత్స అందించడంతోపాటు ఆసుపత్రులకు చికిత్స ఖర్చుల చెల్లింపులను వేగవంతం చేయాలని రాష్ట్ర ప్రభుత్వ ప్రధాన కార్యదర్శి సంజయ్ జాజు ఐఏఎస్ అధికారులను ఆదేశించారు. పీఎం రహత్ పథకాన్ని సమర్థవంతంగా అమలు చేసి, అర్హులైన బాధితులకు నగదు రహిత వైద్య సేవలు అందేలా చర్యలు తీసుకోవాలని సూచించారు.శనివారం హైదరాబాద్ నుంచి జిల్లా కలెక్టర్లు, పోలీస్ కమిషనర్లు, ఎస్పీలు, రవాణా శాఖ అధికారులతో వీడియో కాన్ఫరెన్స్ నిర్వహించారు. పీఎం రహత్ పథకం అమలు విధానం, రోడ్డు ప్రమాద బాధితులకు నగదు రహిత వైద్య సేవలు, ప్రమాద వివరాలను టీఎంఎస్ 2.0 పోర్టల్‌లో నమోదు చేయడం, అర్హులకు పథకం ప్రయోజనాలు అందించడం తదితర అంశాలపై సమీక్షించారు.

టీఎంఎస్ 2.0 పోర్టల్‌లో ప్రమాద వివరాల నమోదు

ప్రభుత్వ, ప్రైవేట్ ఆసుపత్రుల్లో చికిత్స పొందుతున్న రోడ్డు ప్రమాద బాధితుల కేసులను టీఎంఎస్ 2.0 పోర్టల్‌లో తప్పనిసరిగా నమోదు చేయాలని ప్రధాన కార్యదర్శి సూచించారు. ఆసుపత్రుల నుంచి బాధితుల ధ్రువీకరణకు సంబంధించిన అభ్యర్థనలు వచ్చిన వెంటనే పోలీసు అధికారులు స్పందించాలని ఆదేశించారు. దీనివల్ల బాధితులకు సకాలంలో వైద్య సేవలు అందించడంతోపాటు పథకం ప్రయోజనాలు పొందేందుకు వీలవుతుందని పేర్కొన్నారు.

బీమా ఉన్న, లేని వాహనాల కేసుల్లో ప్రత్యేక చర్యలు

ప్రమాదానికి కారణమైన వాహనానికి బీమా ఉంటే, నిబంధనల ప్రకారం బాధితుల చికిత్స ఖర్చులను జనరల్ ఇన్సూరెన్స్ కౌన్సిల్ ద్వారా చెల్లించే ప్రక్రియ చేపట్టాలని తెలిపారు. బీమా లేని వాహనాలకు సంబంధించిన కేసుల్లో జిల్లా కలెక్టర్లు క్లెయిమ్‌ల పరిశీలన, ఆమోదం, చెల్లింపుల ప్రక్రియను పర్యవేక్షించాలని సూచించారు.ఆసుపత్రులకు బిల్లుల చెల్లింపులు సకాలంలో జరిగేలా ఆరోగ్య, పోలీసు, రవాణా శాఖల అధికారులు పరస్పర సమన్వయంతో పనిచేయాలని ఆదేశించారు.

పథకంపై విస్తృతంగా అవగాహన కల్పించాలి

పీఎం రహత్ పథకంపై ప్రజలకు అవగాహన కల్పించేందుకు విస్తృత ప్రచార కార్యక్రమాలు నిర్వహించాలని ప్రధాన కార్యదర్శి సూచించారు. పథకానికి సంబంధించి వచ్చే ఫిర్యాదులను పరిష్కరించేందుకు జిల్లా స్థాయిలో నియమిత గ్రీవెన్స్ పరిష్కార అధికారి తగిన చర్యలు తీసుకోవాలని పేర్కొన్నారు.జిల్లా రోడ్డు భద్రతా కమిటీలో జాతీయ సమాచార కేంద్రం (ఎన్‌ఐసీ) ప్రతినిధిని భాగస్వామిగా చేర్చుకుని అవసరమైన సాంకేతిక సహకారం పొందాలని తెలిపారు. రోడ్డు ప్రమాద బాధితులకు సకాలంలో వైద్య సహాయం అందించడం, ఆసుపత్రులకు చికిత్స ఖర్చుల చెల్లింపుల్లో జాప్యం నివారించడం, అర్హులైన ప్రతి ఒక్కరికీ పథకం ప్రయోజనాలు అందేలా చూడటంపై జిల్లా కలెక్టర్లు నిరంతరం పర్యవేక్షించాలని ఆదేశించారు.

వీడియో కాన్ఫరెన్స్‌లో పాల్గొన్న అధికారులు

సిద్దిపేట సమీకృత జిల్లా కార్యాలయాల సముదాయం నుంచి జిల్లా కలెక్టర్ కె. హైమావతి, జిల్లా రవాణా శాఖ అధికారి యోగేశ్వర్ సింగ్, మోటార్ వెహికల్స్ ఇన్‌స్పెక్టర్ (ఎంవీఐ) శ్రీకాంత్ రెడ్డి, జిల్లా గ్రామీణాభివృద్ధి అధికారి (డీఆర్‌డీఓ) జయదేవ్ ఆర్య, మిషన్ భగీరథ ఈఈ తదితరులు పాల్గొన్నారు.