ఘట్కేసర్, మేజర్ న్యూస్:ఘట్కేసర్ రైల్వే వంతెన నిర్మాణం సాధించే వరకు పార్టీలకు అతీతంగా ఐక్యంగా పోరాడాలని ఘట్కేసర్ శివారెడ్డిగూడలోని బంధన్‌ ఫంక్షన్‌ హాల్‌లో జరిగిన సమావేశంలో అఖిలపక్ష నాయకులు నిర్ణయించారు. పట్టణ భవిష్యత్తు, భావితరాల ప్రయోజనాల దృష్ట్యా వంతెన నిర్మాణం పూర్తయ్యే వరకు పార్టీలకు అతీతంగా ఉద్యమాన్ని కొనసాగించాలని తీర్మానించారు. ఇందులో భాగంగా నాయకులు పార్టీ కండువాలు ధరించకుండా ముందుకు సాగాలని నిర్ణయించారు. సమావేశంలో పాల్గొన్న వంతెన నిర్మాణం వల్ల ఇళ్లు కోల్పోతున్న బాధితులు తమకు సరైన నష్టపరిహారం అందించాలని విజ్ఞప్తి చేశారు. వంతెన నిర్మాణ పనులను వేగవంతం చేసి, వీలైనంత త్వరగా పూర్తి చేసేలా అధికారులు, కాంట్రాక్టర్‌ చర్యలు తీసుకోవాలని ప్రజలు కోరారు. సమావేశం అనంతరం జాతీయ రహదారిపై నిర్మాణ పనులు చేపడుతున్న సదరు కాంట్రాక్టర్‌ సిబ్బందిని కలిసి, ఎక్కువ మంది కూలీలను నియమించి పనులు వేగంగా పూర్తి చేయాలని విజ్ఞప్తి చేశారు. వంతెన సాధన కోసం అందరూ ఐక్యంగా కృషి చేయాలని పిలుపునిచ్చారు. సింగిరెడ్డి రామిరెడ్డి, బండారి శ్రీనివాస్ గౌడ్, అబ్బసాని యాదగిరి యాదవ్, పలుగుల మాధవరెడ్డి, చింతల యాదయ్య, సబిత, రేసు లక్ష్మారెడ్డి, బచ్చు నాగేష్ గుప్తా, బండారి అంజి, బేతాళ నర్సింగ్, ప్రమోద్ గుప్తా, మహిపాల్ రెడ్డి, అంజిరెడ్డి తదితరులు పాల్గొన్నారు.
