ప్రభుత్వ ఆసుపత్రుల్లో సాధారణ ప్రసవాలు పెంచాలి

యాదాద్రిభువనగిరి: ప్రభుత్వ ప్రాథమిక ఆరోగ్య కేంద్రాల్లో సాధారణ ప్రసవాల సంఖ్య పెంచడంతో పాటు గర్భిణులకు మెరుగైన వైద్య సేవలు అందించాలని జిల్లా కలెక్టర్ అనురాగ్ జయంతి వైద్య సిబ్బందిని ఆదేశించారు. బుధవారం భువనగిరి మండలం బొల్లేపల్లి ప్రాథమిక ఆరోగ్య కేంద్రాన్ని ఆయన ఆకస్మికంగా తనిఖీ చేసి వైద్య సేవలు, రోగులకు కల్పిస్తున్న సౌకర్యాలను పరిశీలించారు.ఆసుపత్రికి రోజూ వస్తున్న రోగుల సంఖ్య, ఓపీ వివరాల ఆన్‌లైన్ నమోదు,అభా  రిజిస్ట్రేషన్లపై ఆరా తీశారు. రోగుల వివరాలను ఎప్పటికప్పుడు ఆన్‌లైన్‌లో నమోదు చేయాలని సూచించారు.గత నెలలో ప్రసవ తేదీలు ఉన్న గర్భిణులు ఎంతమంది? వారిలో ఎంతమందికి సాధారణ ప్రసవాలు నిర్వహించారంటూ వివరాలు అడిగి తెలుసుకున్నారు. సాధారణ ప్రసవాలకు అవసరమైన అన్ని సదుపాయాలు ఉన్నప్పటికీ ప్రసవాలు నిర్వహించకపోవడంపై అసంతృప్తి వ్యక్తం చేశారు. గర్భిణులకు క్రమం తప్పకుండా వైద్య పరీక్షలు నిర్వహిస్తూ, నిరంతర పర్యవేక్షణతో ప్రభుత్వ ఆసుపత్రుల్లోనే సాధారణ ప్రసవాలు జరిగేలా చర్యలు తీసుకోవాలని స్పష్టం చేశారు.ఆసుపత్రికి వచ్చిన గర్భిణులు, బాలింతలతో నేరుగా మాట్లాడి వైద్య సేవలు, హిమోగ్లోబిన్ శాతం, మందుల వినియోగంపై వివరాలు తెలుసుకున్నారు. ఆరోగ్యంపై ప్రత్యేక శ్రద్ధ వహించాలని, ఐరన్‌తోపాటు పోషక విలువలున్న ఆహారం తీసుకోవాలని సూచించారు. చిన్నారులకు నిర్ణీత షెడ్యూల్ ప్రకారం టీకాలు వేయించాలని తల్లిదండ్రులకు సూచించారు.కార్యక్రమంలో జిల్లా వైద్యాధికారి మనోహర్, సంబంధిత అధికారులు పాల్గొన్నారు.