దశాబ్దాల తర్వాత ఆయిల్‌ఫెడ్ నియామకాలకు గ్రీన్ సిగ్నల్
దమ్మపేట, (సూర్య)-దశాబ్దాల తర్వాత తెలంగాణ ఆయిల్‌ఫెడ్ వివిధ కేటగిరీల కింద ఉద్యోగ నియామకాలకు నోటిఫికేషన్ విడుదల చేయడం పట్ల రాష్ట్ర కీలక రైతు సంఘ నాయకులు మద్దినేని వెంకట్, బండి భాస్కర్లు వ్యవసాయ మంత్రి తుమ్మల నాగేశ్వరరావుకు ఒక ప్రకటనలో ప్రత్యేక ధన్యవాదాలు తెలిపారు.
ఈ సందర్భంగా వారు మాట్లాడుతూ జీఓఎంఎస్ నెంబర్ 144, తేదీ 31.10.2026 ప్రకారం మొత్తం వివిధ కేటగిరీల కింద 73 పోస్టులకు ప్రభుత్వం గ్రీన్ సిగ్నల్ ఇచ్చిందన్నారు. హైదరాబాద్ జవహర్‌లాల్ నెహ్రూ టెక్నలాజికల్ యూనివర్సిటీ నేతృత్వంలో నేరుగా అర్హులైన వారిని ఎంపిక చేసే ప్రక్రియ మొదలైందని వివరించారు.మేనేజర్ ఫైనాన్స్ 1 పోస్టు, మేనేజర్ ఓపీడీ/డీఓ 1, డిప్యూటీ మేనేజర్ మెకానికల్ 2, డిప్యూటీ మేనేజర్ హార్టికల్చర్/అగ్రికల్చర్ 3, అసిస్టెంట్ ఎగ్జిక్యూటివ్ ఇంజనీర్ మెకానికల్ 7, అసిస్టెంట్ ఎగ్జిక్యూటివ్ ఇంజనీర్ ఎలక్ట్రికల్ 3, అసిస్టెంట్ ఎగ్జిక్యూటివ్ ఇంజనీర్ సివిల్ 2, సీనియర్ ఆపరేటర్స్/ఫోర్‌మెన్ 1, ఎగ్జిక్యూటివ్ జనరల్ 9, ఏరియా ఆఫీసర్ 7, కెమిస్ట్ 4, ఫీల్డ్ ఆఫీసర్ 11, జూనియర్ ఆపరేటర్ 8, జూనియర్ ఎగ్జిక్యూటివ్స్ 14 పోస్టులు ఉన్నాయని తెలిపారు. వీటికి ఆయా విద్యార్హతల ప్రాతిపదికన రిజిస్ట్రార్ జేఎన్‌టీయూ నేతృత్వంలో పారదర్శకంగా ఎంపిక జరుగుతుందన్నారు.
దరఖాస్తు చేసుకోవాలనుకునే ఔత్సాహిక విద్యావంతులు టీఎస్ ఆయిల్‌ఫెడ్ హైదరాబాద్ కేంద్ర కార్యాలయాన్ని లేదా వెబ్‌సైట్‌ను సందర్శించి ఏవైనా సందేహాలుంటే నివృత్తి చేసుకోవచ్చని వారు విజ్ఞప్తి చేశారు. ఇప్పటిదాకా సిబ్బంది కొరత కారణంగా సమాఖ్య సవాలక్ష సవాళ్లను ఎదుర్కొన్నదని, అయినా నిర్దేశించుకున్న లక్ష్యాలను అధిగమించడం ముదావహం కాగా, చాలినంత సిబ్బంది చేతుల్లో ఉన్నప్పుడు మరింత మెరుగైన ఫలితాలను సాధించడం తథ్యమని వారు ఆశాభావం వ్యక్తం చేశారు.
