ప్రాథమిక పాఠశాల విద్యార్థులకు స్పోకెన్ ఇంగ్లీష్‌పై ప్రత్యేక శిక్షణ తరగతులు ---ప్రముఖ స్పోకెన్ ఇంగ్లీష్ శిక్షకులు, కార్పొరేట్ ట్రైనర్ డా. కె.వి. నారాయణ్
ఖమ్మం, సూర్య (మేజర్ న్యూస్):ప్రభుత్వ పాఠశాల విద్యార్థుల్లో ఆంగ్ల భాషపై ఆసక్తిని పెంపొందించి, ఆంగ్లంలో మాట్లాడే నైపుణ్యాలను అభివృద్ధి చేయాలనే లక్ష్యంతో ఖమ్మం అర్బన్ మండలంలోని బల్లేపల్లి ఎం .పి.పి.ఎస్ పాఠశాలలో విద్యార్థులకు ప్రత్యేకంగా స్పోకెన్ ఇంగ్లీష్ శిక్షణ తరగతులు నిర్వహించారు.ఈ కార్యక్రమానికి ప్రముఖ స్పోకెన్ ఇంగ్లీష్ శిక్షకులు, కార్పొరేట్ ట్రైనర్ డా. కె.వి. నారాయణ్ హాజరై విద్యార్థులకు ప్రత్యేక తరగతులు నిర్వహించారు. ఈ సందర్భంగా ఆంగ్ల భాషను సులభంగా ఎలా నేర్చుకోవాలి, రోజువారీ జీవితంలో ఆంగ్ల పదాలను, వాక్యాలను ఎలా ఉపయోగించాలి, ఎలాంటి భయం లేకుండా ఆంగ్లంలో ఎలా మాట్లాడాలి అనే అంశాలపై విద్యార్థులకు అవగాహన కల్పించారు.
విద్యార్థులు అడిగిన పలు సందేహాలను నివృత్తి చేస్తూ, ఆంగ్ల భాషపై ఆత్మవిశ్వాసాన్ని పెంపొందించే విధంగా పలు సూచనలు చేశారు. నిరంతర సాధనతో ఆంగ్లంలో అనర్గళంగా మాట్లాడటం సాధ్యమని వివరించారు.ఈ కార్యక్రమంలో పాఠశాల ప్రధానోపాధ్యాయురాలు కె. వెంకట కుమారి, ఉపాధ్యాయురాలు సరస్వతి పాల్గొన్నారు. విద్యార్థులకు ఇలాంటి ప్రత్యేక శిక్షణ తరగతులు ఎంతగానో ఉపయోగపడతాయని వారు అభిప్రాయపడ్డారు.ప్రభుత్వ పాఠశాల విద్యార్థులకు ఆంగ్ల భాషపై పట్టు సాధించేలా ఇటువంటి కార్యక్రమాలు నిర్వహించడం అభినందనీయమని పలువురు పేర్కొన్నారు.
