ఫోటోలకు ఫోజులేనా... విగ్రహాల మరమ్మతులకు సహకారం ఏది

కాజీపేట, మేజర్ న్యూస్, హనుమకొండ జిల్లా కాజీపేట పట్టణంలోని ఎలక్ట్రిక్ లోకో షెడ్ కాలనీ, శాంతి కళా సంఘం ఆధ్వర్యంలో జవహర్‌లాల్ నెహ్రూ విగ్రహాలు పూర్తిగా చెడిపోవడంతో స్థానికంగా చర్చనీయాంశంగా మారింది. అయితే జాతీయ నాయకుల విగ్రహాల ఏర్పాటు, నిర్వహణ, మరమ్మతుల విషయంలో రాజకీయ నాయకులు చూపిస్తున్న నిర్లక్ష్యంపై పలువురు అసంతృప్తి వ్యక్తం చేస్తున్నారు. జాతీయ నాయకుల విగ్రహాల వద్దకు వచ్చినప్పుడు ఫోటోలకు ఫోజులిస్తూ ప్రచారం పొందేందుకు నాయకులు ఆసక్తి చూపుతున్నారని, కానీ విగ్రహాల మరమ్మతులు, నిర్వహణకు అవసరమైన సమయంలో మాత్రం ముందుకు రావడం లేదనే విమర్శలు వినిపిస్తున్నాయి. జాతీయ నాయకుల విగ్రహాలు కేవలం ఆవిష్కరణలు, పూలమాలలు, ఫోటోలకు మాత్రమే పరిమితం కాకుండా వాటి గౌరవాన్ని కాపాడేలా నిరంతర నిర్వహణ చేపట్టాల్సిన బాధ్యత అందరిపై ఉందని స్థానికులు అభిప్రాయపడుతున్నారు. ఇప్పటికైనా సంబంధిత నాయకులు, ప్రజాప్రతినిధులు స్పందించి విగ్రహాల మరమ్మతులు, నిర్వహణకు సహకరించాలని, జాతీయ నాయకుల పట్ల గౌరవాన్ని మాటల్లో కాకుండా చేతల్లో చూపించాలని ప్రజలు కోరుతున్నారు.

రిపోర్టర్; గిరి ప్రసాద్, కాజీపేట, హనుమకొండ జిల్లా