పెండింగ్ కేసుల పరిష్కారం, నేరాల నియంత్రణపై ప్రత్యేక దృష్టి పెట్టాలి

రామాయంపేట ; మంగళవారం నిజాంపేట పోలీస్ స్టేషన్‌ను మెదక్ జిల్లా ఎస్పీ డి.వి. శ్రీనివాసరావు ఐపీఎస్ ఆకస్మికంగా తనిఖీ చేశారు. ఈ సందర్భంగా ఎస్‌ఐ రాజేష్ మొక్కను అందజేసి ఎస్పీకి స్వాగతం పలికారు. అనంతరం స్టేషన్ రికార్డులు, పెండింగ్ కేసులు, దర్యాప్తు పురోగతిని పరిశీలించి అధికారులకు పలు సూచనలు చేశారు.పెండింగ్ కేసులను వేగవంతంగా పరిష్కరించి బాధితులకు సత్వర న్యాయం అందించాలని, సీసీపీఎన్ఎస్ , ఈ-సాక్ష్య అప్లికేషన్లలో వివరాలను ఎప్పటికప్పుడు అప్‌డేట్ చేయాలని ఆదేశించారు.షీ టీమ్స్ ఆధ్వర్యంలో పాఠశాలలు, కళాశాలల్లో ‘పోలీస్ అక్క’ కార్యక్రమం నిర్వహించాలని, విపిఓ లు ప్రతి గ్రామాన్ని సందర్శించి డ్రగ్స్ దుష్ప్రభావాలు, సైబర్ నేరాలు, ఆన్‌లైన్ మోసాలపై అవగాహన కల్పించాలని సూచించారు. కళాబృందాల సహకారంతో విస్తృత ప్రచారం చేపట్టాలని తెలిపారు.అనంతరం సిబ్బందితో సమావేశమై వారి సమస్యలను తెలుసుకున్నారు. క్రమశిక్షణతో విధులు నిర్వహిస్తూ ప్రజలకు మెరుగైన సేవలు అందించాలని, అవినీతికి పాల్పడితే నిబంధనల ప్రకారం కఠిన చర్యలు తీసుకుంటామని హెచ్చరించారు.ఈ తనిఖీలో సీఐలు సైదా, సందీప్ రెడ్డి, ఎస్‌ఐ రాజేష్, పోలీస్ సిబ్బంది పాల్గొన్నారు.