పందిరిపల్లిగూడెం ఎంపీటీసీగా పద్మాదేవిని ఏకగ్రీవం

కైకలూరు: మేజర్ న్యూస్, జనసేన పార్టీ తరఫున కైకలూరు ఎంపీపీ అభ్యర్థిగా బూరుబోయిన పద్మాదేవిని నిలబెట్టే లక్ష్యంతో ఆమె భర్త బూరుబోయిన శ్రీనివాసరావు (బి.ఎస్.ఆర్.) తన ఎంపీటీసీ నామినేషన్‌ను మంగళవారం ఉపసంహరించుకున్నారు. అనంతరం ఏర్పాటు చేసిన మీడియా సమావేశంలో ఆయన మాట్లాడుతూ పందిరిపల్లిగూడెం గ్రామ ప్రజలు తన భార్య పద్మాదేవిని ఏకగ్రీవంగా ఎన్నుకుంటామని హామీ ఇచ్చారని బి.ఎస్.ఆర్. తెలిపారు. ఆ గ్రామంలో ఎంపీటీసీ స్థానం జనరల్ మహిళకు కేటాయించడంతో పద్మాదేవి అక్కడి నుంచి నామినేషన్ దాఖలు చేశారని వివరించారు.అయితే, పందిరిపల్లిగూడెం నుంచి తన భార్యకు డమ్మీ అభ్యర్థిగా నామినేషన్ వేసే అవకాశం లేకపోవడంతో, తాను చటాకాయ్ గ్రామం నుంచి ఎంపీటీసీ అభ్యర్థిగా నామినేషన్ దాఖలు చేసినట్లు వెల్లడించారు. స్క్రూటినీ ప్రక్రియలో తన నామినేషన్ ఆమోదం పొందిందని, అనంతరం తన భార్యకు జనసేన పార్టీ బీ-ఫారం లభించడంతో చటాకాయ్ నుంచి దాఖలు చేసిన తన నామినేషన్‌ను ఉపసంహరించుకున్నట్లు తెలిపారు.పందిరిపల్లిగూడెం ఎంపీటీసీగా పద్మాదేవిని ఏకగ్రీవంగా ఎన్నుకుని, ఆమెను ఎంపీపీగా నిలబెట్టేందుకు సహకరించాలని కొల్లేరు ప్రాంత ప్రజలకు  విజ్ఞప్తి చేశారు. తన భార్యకు మద్దతుగా నిలుస్తున్న గ్రామ ప్రజలందరికీ మరోసారి కృతజ్ఞతలు తెలిపారు. సమావేశంలో జనసేన నాయకులు కొల్లి వరప్రసాద్ (బాబి) పాల్గొన్నారు.