సీట్లు సర్దుబాటులో సమన్వయం ఏది

నేటి దినపత్రిక సూర్య బ్యూరో రాజమహేంద్రవరంకూటమి పార్టీల మధ్య సీట్ల సర్దుబాటులో సమన్వయం లోపించిందని కడియం మండల బీజేపీ అధ్యక్షుడు బొరుసు సుబ్రమణ్యం అసంతృప్తి వ్యక్తం చేశారు. అభ్యర్థుల ఎంపికకు ముందు మూడు పార్టీల మండల స్థాయి నాయకులతో సమావేశం నిర్వహించి ఉంటే ఇలాంటి భేదాభిప్రాయాలు వచ్చేవి కావన్నారు.

కార్యకర్త స్థాయి నుంచి కాకినాడ పార్లమెంట్ ఇన్‌చార్జిగా ఎదిగిన ఆకుల శ్రీధర్ కడియం జడ్పీటీసీ స్థానం కోసం ప్రయత్నించారని తెలిపారు. ఆయనకు అవకాశం కల్పించేందుకు బీజేపీ అధిష్ఠానం కృషి చేసినప్పటికీ, కూటమి సీట్ల సర్దుబాటులో ఆ స్థానం జనసేనకు దక్కిందని వివరించారు.

ఈ పరిణామాలను ఆసరాగా చేసుకుని బీజేపీ నాయకత్వంపై అపోహలు సృష్టించడం సరికాదని, పార్టీపై బురదజల్లే ప్రయత్నాలను సహించేది లేదని సుబ్రమణ్యం హెచ్చరించారు. మిత్రధర్మానికి కట్టుబడి టీడీపీ, జనసేనతో కలిసి కూటమి అభ్యర్థుల విజయానికి కృషి చేస్తామని స్పష్టం చేశారు. భవిష్యత్తులో ఇలాంటి పరిస్థితులు తలెత్తకుండా మిత్రపక్షాలు సమన్వయంతో వ్యవహరించాలని సూచించారు.