telangana
పేదరికం చదువుకు అడ్డు కాదు - ఒకే కుటుంబంలో ముగ్గురు వైద్యులు
సూర్య జమ్మికుంట : ఆర్థిక ఇబ్బందులు, పేదరికం చదువుకు ఏమాత్రం అడ్డుకాదని నిరూపించారు జమ్మికుంట మున్సిపల్ పరిధిలోని ఆబాది జమ్మికుంటకు చెందిన హోంగార్డు ఎస్ కే గౌస్.పోలీస్ శాఖలో హోంగార్డుగా విధులు నిర్వహిస్తున్న గౌస్ సాధారణ ఉద్యోగం చేస్తూ, పరిమిత ఆదాయంతో కుటుంబాన్ని పోషిస్తూనే తన ముగ్గురు పిల్లలను వైద్యులుగా తీర్చిదిద్దారు. ఇద్దరు కుమార్తెలు, ఒక కుమారుడిని ఉన్నత విద్యావంతులుగా మార్చి తండ్రిగా తన బాధ్యతను గొప్పగా నిర్వర్తించారు.పిల్లల చదువుకు ఎలాంటి లోటు రాకుండా ఎన్నో త్యాగాలు చేశారు. వారి భవిష్యత్తే లక్ష్యంగా ముందుకు సాగారు. తండ్రి కష్టం, త్యాగం, ప్రోత్సాహానికి పిల్లలు తమ ప్రతిభతో ప్రతిఫలం అందించారు.పెద్ద కుమార్తె ఎస్ కే హజారా కాకతీయ మెడికల్ కాలేజీలో ఎంబిబిఎస్ పూర్తి చేసింది. రెండవ కుమార్తె ఖమ్మం ప్రభుత్వ మెడికల్ కాలేజీలో మూడవ సంవత్సరం వైద్య విద్యను అభ్యసిస్తోంది. ఏకైక కుమారుడు నవాజ్ అలీ నిజామాబాద్ ప్రభుత్వ మెడికల్ కళాశాలలో ఎంబిబిఎస్ సీటు సాధించాడు.సంపద ఉంటేనే ఉన్నత శిఖరాలను అధిరోహించగలమనే భావనను పటాపంచలు చేస్తూ, పట్టుదల, కష్టపడే తత్వం, విద్యపై ఆసక్తి ఉంటే పేదరికాన్ని సైతం అధిగమించవచ్చని ఈ కుటుంబం నిరూపించింది.ఒక సాధారణ హోంగార్డు తన ముగ్గురు పిల్లలను వైద్యులుగా తీర్చిదిద్దడం సమాజానికి స్ఫూర్తిదాయకం. ముఖ్యంగా ఆర్థిక ఇబ్బందుల కారణంగా చదువుకు దూరమవుతున్న విద్యార్థులకు, తల్లిదండ్రులకు గౌస్ కుటుంబం ఆదర్శంగా నిలుస్తోంది. పిల్లల విజయమే తన జీవితానికి అసలైన సంపదగా భావించే ప్రతి తండ్రికి ఈ కథనం ఒక నిదర్శనం.