telangana
గోమాతల సంరక్షణ ప్రతి ఒక్కరి బాధ్యత - హనుమాన్ గోశాల, క్షత్రియ పాఠశాలలో ప్రత్యేక పూజలు
సూర్య, ఆర్మూర్ : ఆర్మూర్ పట్టణంలో విశ్వ హిందూ పరిషత్ ఆధ్వర్యంలో హనుమాన్ గోశాల, క్షత్రియ పాఠశాలలో గోపాష్టమి వేడుకలను నిర్వహించారు. ఈ సందర్భంగా గోమాతలకు ప్రత్యేక పూజలు చేసి, వాటి ప్రాముఖ్యతను వివరించారు.హిందూ సంప్రదాయం ప్రకారం కార్తీక మాసం శుక్లపక్ష అష్టమి రోజును గోపాష్టమిగా జరుపుకుంటారు. శ్రీకృష్ణుడు ఐదేళ్ల వయస్సు నిండిన తర్వాత తొలిసారిగా అన్న బలరాముడితో కలిసి గోవులను మేపడానికి అడవికి వెళ్లిన రోజుగా ఈ పర్వదినానికి పురాణాల్లో ప్రత్యేక స్థానం ఉంది. ఈ ఘట్టాన్ని గోచరణ లీలగా పేర్కొంటారు. గోవర్ధన గిరిని ఎత్తి గోవులను, బృందావన ప్రజలను శ్రీకృష్ణుడు రక్షించిన ఘట్టాన్ని కూడా ఈ పర్వదినంతో అనుసంధానించి భక్తులు స్మరించుకుంటారు.హిందూ ధర్మంలో గోవును గోమాతగా భావించి పూజిస్తారని, గోవులో ముక్కోటి దేవతలు కొలువై ఉంటారనే విశ్వాసం ఉందని నిర్వాహకులు తెలిపారు. గోమాతను పూజించడం మాత్రమే కాకుండా వాటికి ఆహారం అందించడం, సంరక్షించడం, సేవ చేయడం ప్రతి ఒక్కరి బాధ్యత అని పేర్కొన్నారు. గోరక్షణ, గోసేవ భారతీయ సంస్కృతిలో అంతర్భాగమని, ప్రతి ఒక్కరూ గోవుల సంరక్షణకు ముందుకు రావాలని పిలుపునిచ్చారు.
ఈ కార్యక్రమంలో పాఠశాల ప్రిన్సిపాల్ లక్ష్మి, జిల్లా కార్యదర్శి గాజుల దయానంద్, జిల్లా విశేష సంపర్క ప్రముఖ్ అల్జపూర్ అక్షయ్, నగర కార్యదర్శి కొంగి రవి, ఉపాధ్యక్షుడు గంజాల ప్రేమ్, సహ కార్యదర్శి కరణ్, సురక్ష ప్రముఖ్ ప్రవీణ్, సత్సంగ్ ప్రముఖ్ సచిన్, బలోపాసన ప్రముఖ్ సాయి, సప్తాహిక్ మిలన్ అరవింద్, నరేందర్, శ్రవీణ్, మహిళలు, పిల్లలు, కార్యకర్తలు పాల్గొన్నారు.