పేద కుటుంబాలకు అండగా 'ఇందిరమ్మ జీవిత బీమా'- రంగపేటలో పథకాన్ని ప్రారంభించిన ఏఎంసీ చైర్మన్ రేవెల్లి రాజలింగం
సూర్య - మానకొండూర్ : తెలంగాణ రాష్ట్ర ప్రభుత్వం ఎంతో ప్రతిష్ఠాత్మకంగా ప్రవేశపెట్టిన 'ఇందిరమ్మ కుటుంబ జీవిత బీమా' పథకాన్ని మానకొండూర్ మండలం రంగపేట గ్రామ పంచాయతీ కార్యాలయంలో ఘనంగా ప్రారంభించారు. గ్రామ సర్పంచ్ కొత్త రాంరెడ్డి ఆధ్వర్యంలో జరిగిన ఈ కార్యక్రమానికి ముఖ్య అతిథిగా మానకొండూర్ వ్యవసాయ మార్కెట్ కమిటీ చైర్మన్ రేవెల్లి రాజలింగం హాజరై పథకాన్ని లాంఛనంగా ప్రారంభించారు.ఈ సందర్భంగా ఏఎంసీ చైర్మన్ రేవెల్లి రాజలింగం మాట్లాడుతూ.. ముఖ్యమంత్రి రేవంత్ రెడ్డి, స్థానిక మానకొండూర్ ఎమ్మెల్యే డాక్టర్ కవ్వంపల్లి సత్యనారాయణ నాయకత్వంలో ప్రజా ప్రభుత్వం పేద, బడుగు, బలహీన వర్గాల సంక్షేమమే ప్రధాన లక్ష్యంగా పనిచేస్తోందని పేర్కొన్నారు. అనుకోని ఆపద సమయంలో ఆర్థికంగా ఇబ్బంది పడే నిరుపేద కుటుంబాలకు ఈ 'ఇందిరమ్మ కుటుంబ జీవిత బీమా' ఒక భరోసాగా నిలుస్తుందని తెలిపారు. ఆయా కుటుంబాలకు ఆర్థిక ఆసరా అందించి, వారి జీవితాల్లో వెలుగులు నింపాలన్నదే ఈ పథకం ముఖ్య ఉద్దేశమని వివరించారు.ఎన్నికల్లో ఇచ్చిన ప్రతి హామీని నెరవేరుస్తూ కాంగ్రెస్ పార్టీ పేదల పక్షపాతిగా నిలిచిందని రేవెల్లి రాజలింగం కొనియాడారు. ఆరు గ్యారెంటీలతో పాటు ఇలాంటి వినూత్న సంక్షేమ పథకాలతో నియోజకవర్గం, రాష్ట్రం అభివృద్ధి పథంలో దూసుకెళ్తోందని చెప్పారు. ప్రభుత్వం అందిస్తున్న ఈ గొప్ప అవకాశాన్ని గ్రామంలోని అర్హులైన ప్రతి ఒక్కరూ సద్వినియోగం చేసుకోవాలని ఆయన కోరారు.ఈ కార్యక్రమంలో ఉపసర్పంచ్ వేల్పుల కొమురయ్య, వార్డు సభ్యులు రుద్రారం లచ్చయ్య, శ్రీకాంత్ రెడ్డి, కాంగ్రెస్ పార్టీ గ్రామ శాఖ అధ్యక్షులు గుడాల మహేందర్ గౌడ్, నాయకులు నాగిరెడ్డి, శ్రీనివాస్ రెడ్డి తదితరులు పాల్గొన్నారు.