నా పేరు వాడితే తాటతీస్తా.... ఎమ్మెల్యే వీర్లపల్లి శంకర్

*నా పేరు ఎవరైనా వాడితే తాటతీస్తా* 

 *అర్హత ఉన్న వారికే ఉద్యోగాలు..* 

 *పైరవీలు, సిఫార్సులకు తావులేదు* 

 *షాద్‌నగర్ ఎమ్మెల్యే, రాష్ట్ర ప్రభుత్వ రంగ సంస్థల చైర్మన్ వీర్లపల్లి శంకర్ హెచ్చరిక* 

 *అంగన్వాడీ పోస్టుల నియామకాల్లో పారదర్శకత* 

అంగన్వాడీ పోస్టుల నియామకాల్లో తన పేరు చెప్పి ఎవరైనా డబ్బులు డిమాండ్ చేస్తే కఠిన చర్యలు తీసుకుంటామని షాద్‌నగర్ ఎమ్మెల్యే, రాష్ట్ర ప్రభుత్వ రంగ సంస్థల చైర్మన్ వీర్లపల్లి శంకర్ హెచ్చరించారు. అంగన్వాడీ ఉద్యోగాల విషయంలో మధ్యవర్తులను నమ్మి డబ్బులు చెల్లించి ఎవరూ నష్టపోవద్దని ఆయన స్పష్టం చేశారు. గురువారం ఎమ్మెల్యే క్యాంపు కార్యాలయంలో పలువురు అంగన్వాడీ పోస్టుల నియామకాలకు సంబంధించిన అంశాలను ఎమ్మెల్యే దృష్టికి తీసుకురాగా, ఈ విషయంపై ఆయన మీడియాతో మాట్లాడారు. అంగన్వాడీ పోస్టుల నియామక ప్రక్రియలో పూర్తి పారదర్శకత పాటిస్తామని, ప్రభుత్వ నిబంధనల ప్రకారం అర్హత ఉన్న అభ్యర్థులకే ఉద్యోగాలు లభిస్తాయని తెలిపారు.

పైరవీలు, సిఫార్సులకు తావులేదు

అంగన్వాడీ పోస్టుల భర్తీలో ఎవరి సిఫార్సులు, పైరవీలు పనిచేయవని ఎమ్మెల్యే శంకర్ స్పష్టం చేశారు. అభ్యర్థుల అర్హత, ప్రభుత్వ నిబంధనల ప్రకారమే నియామకాలు జరుగుతాయని తెలిపారు. ఉద్యోగం ఇప్పిస్తామని చెప్పే మధ్యవర్తులను నమ్మి డబ్బులు చెల్లించి మోసపోవద్దని అభ్యర్థులకు సూచించారు. తన పేరు చెప్పి లేదా తన పేరును ఉపయోగించుకొని ఎవరైనా డబ్బులు డిమాండ్ చేస్తే ఆ విషయాన్ని వెంటనే తన దృష్టికి తీసుకురావాలని కోరారు. తన పేరు దుర్వినియోగం చేస్తూ ఉద్యోగాల పేరుతో డబ్బులు వసూలు చేసే వారిని ఎట్టి పరిస్థితుల్లోనూ ఉపేక్షించబోనని, అలాంటి వారి తాట తీస్తానని తీవ్రంగా హెచ్చరించారు. అంగన్వాడీ పోస్టుల నియామకాల్లో ఐసీడీఎస్, రెవెన్యూ అధికారులు నిష్పక్షపాతంగా వ్యవహరించాలని ఎమ్మెల్యే సూచించారు. నియామక ప్రక్రియలో అనవసర జోక్యం చేసుకోవడం, అక్రమాలకు పాల్పడటం వంటి చర్యలను సహించబోమని స్పష్టం చేశారు. ప్రభుత్వం నిబంధనల ప్రకారం నిష్పక్షపాతంగా ఉద్యోగాలను కేటాయిస్తుందని, అర్హత ఉన్న ప్రతి అభ్యర్థికి న్యాయం జరిగేలా చర్యలు తీసుకుంటామని వీర్లపల్లి శంకర్ తెలిపారు.

జవాజి రాఘవేందర్ గౌడ్, మేజర్ న్యూస్ షాద్ నగర్