ముదిరాజులకు రాజ్యాధికారంలొ సముచిత స్థానం కల్పించాలి
-- తెలంగాణ ముదిరాజ్ మహాసభ రాష్ట్ర ఉపాధ్యక్షులు పెద్ద విజయ్ కుమార్ ముదిరాజ్, జిల్లా అధ్యక్షులు మెట్టుకాడి ప్రభాకర్ ముదిరాజ్
మహబూబ్నగర్, సూర్య ప్రతినిధి:
తెలంగాణ రాష్ట్రంలో ముదిరాజ్ సామాజిక వర్గానికి అన్ని రాజకీయ పార్టీలు రాజ్యాధికారంలో సముచిత భాగస్వామ్యం కల్పించాలని తెలంగాణ ముదిరాజ్ మహాసభ రాష్ట్ర ఉపాధ్యక్షులు పెద్ద విజయ్ కుమార్ ముదిరాజ్, మహబూబ్నగర్ జిల్లా అధ్యక్షులు మెట్టుకాడి ప్రభాకర్ ముదిరాజ్ డిమాండ్ చేశారు. ఎన్నికల సమయంలో ముదిరాజుల ఓట్లు కోరే రాజకీయ పార్టీలు అధికారంలో భాగస్వామ్యం కల్పించే విషయంలోనూ చిత్తశుద్ధి చూపాలని అన్నారు.
ఈ సందర్భంగా వారు మాట్లాడుతూ.. ముదిరాజులు కేవలం ఓటు బ్యాంకుగా మిగిలిపోవడానికి సిద్ధంగా లేరని, తమ జనాభా, సామాజిక బలం, రాజకీయ ప్రాధాన్యతకు అనుగుణంగా చట్టసభల్లో, ప్రభుత్వ పదవుల్లో తగిన ప్రాతినిధ్యం కల్పించాలని కోరారు. ముదిరాజుల ఆత్మగౌరవం, హక్కులు, అభివృద్ధి కోసం అన్ని రాజకీయ పార్టీలు స్పష్టమైన నిర్ణయాలు తీసుకోవాలని సూచించారు.
కాంగ్రెస్ పార్టీ ఎన్నికల మేనిఫెస్టోలో పొందుపరిచిన హామీల ప్రకారం ముదిరాజులను ప్రస్తుత బీసీ-బి నుంచి తగిన బీసీ గ్రూపులోకి మార్చాలని, బీసీ కార్పొరేషన్కు రూ.1,000 కోట్ల నిధులు కేటాయించాలని మెట్టుకాడి ప్రభాకర్ ముదిరాజ్ కోరారు. అదేవిధంగా డీలిమిటేషన్ ప్రక్రియలో ముదిరాజ్ సామాజిక వర్గానికి జనాభా ప్రాతిపదికన అధిక సంఖ్యలో రాజకీయ సీట్లు కేటాయించాలని డిమాండ్ చేశారు.
ముదిరాజ్ సమాజం రాజకీయంగా, ఆర్థికంగా, సామాజికంగా అభివృద్ధి చెందాలంటే రాజ్యాధికారంలో భాగస్వామ్యం తప్పనిసరని పేర్కొన్నారు. హామీలు ఇవ్వడమే కాకుండా వాటిని ఆచరణలో అమలు చేయాలని, ముదిరాజుల హక్కుల సాధన కోసం సమాజమంతా ఐక్యంగా ముందుకు సాగాలని పిలుపునిచ్చారు.
ఈ కార్యక్రమంలో పండుగ సాయన్న సేవా సమితి అధ్యక్షులు కృష్ణ ముదిరాజ్, జనరల్ సెక్రటరీ పాతూర్ కుమార్, మత్స్య సహకార సంఘం సొసైటీ జనరల్ సెక్రటరీ బాల, పీయూజేఏసీ ప్రకాష్ ముదిరాజ్, రాము, ఏఐవైఎఫ్ తెలంగాణ రాష్ట్ర జనరల్ సెక్రటరీ మైత్రి యాదయ్య, కాంగ్రెస్ పార్టీ నాయకులు శ్రీనివాస్, వాల్మీకి సంఘం అధ్యక్షులు ఊరిని చెన్నయ్య, గుత్తేదార్ సురేష్ ముదిరాజ్, ఏఐఎస్ఎఫ్ లక్ష్మణ్ ముదిరాజ్, గోపి, టంకర రాజు, దోమ వెంకటేష్, బీసీ విద్యార్థి సంఘం జిల్లా అధ్యక్షులు తిరుమలేష్, శివన్న, రజక సంఘం ఉమ్మడి జిల్లా అధ్యక్షులు తదితరులు పాల్గొన్నారు.