లయన్స్ క్లబ్ సేవా కార్యక్రమాలు.. ప్రభుత్వ పాఠశాలలకు పుస్తకాలు, క్రీడా సామాగ్రి అందజేత
సూర్య - మానకొండూర్ : లయన్స్ క్లబ్ ఆఫ్ కరీంనగర్ 320జి ఆధ్వర్యంలో మానకొండూర్‌లో ఆదివారం పలు సేవా కార్యక్రమాలు ఘనంగా నిర్వహించారు. జిల్లా గవర్నర్ లయన్ మోర భద్రేశం అధికారిక పర్యటనలో భాగంగా ఈ కార్యక్రమాలను చేపట్టారు. విద్య, క్రీడలు, సామాజిక చైతన్యం పట్ల తమ క్లబ్‌కు ఉన్న నిబద్ధతను చాటుకుంటూ ఈ సేవా కార్యక్రమాలు కొనసాగాయి.ప్రభుత్వ పాఠశాలల విద్యార్థులలో చదువుపై ఆసక్తిని పెంచే ఉద్దేశంతో ఏకంగా 1,001 పుస్తకాలను పంపిణీ చేయడంతో పాటు, విద్యార్థుల శారీరక ఉల్లాసం కోసం క్రీడా సామాగ్రిని అందజేశారు. అంతేకాకుండా, మానకొండూర్‌లోని మూడు అంబేద్కర్ కమ్యూనిటీ కేంద్రాలకు ప్రజల్లో దైనందిన విషయాలపై అవగాహన పెంపొందించేందుకు రోజూవారీ దినపత్రికలను బహూకరించారు. ఇదే వేదికపై లయన్స్ క్లబ్ ద్వారా విద్యా సహాయం పొందుతున్న ఒక బాలికకు చదువుల నిమిత్తం ఆర్థిక సహాయ చెక్కును అందజేసి అండగా నిలిచారు.ఈ సందర్భంగా లయన్స్ క్లబ్ ప్రతినిధులు మాట్లాడుతూ.. ప్రజలకు సహాయపడటమే లయన్స్ క్లబ్ ప్రధాన ఆశయమని స్పష్టం చేశారు. ఈ కార్యక్రమంలో లయన్స్ జి.వి.రామకృష్ణారావు, లయన్స్ క్లబ్ ఆఫ్ కరీంనగర్ జిల్లా 320జి అధ్యక్షుడు లయన్ మైదారం శివకాంత్, లయన్ బత్తో వినోద్, లయన్ కృష్ణ చైతన్య, ఆర్.సి.ఆర్.ఎస్.పి. రెడ్డి, జెడ్.సి.ముక్కా కృష్ణ తదితరులు పాల్గొన్నారు.
