నాగర్‌కర్నూల్‌లో ఎన్‌హెచ్‌ఎం ఉద్యోగుల వినూత్న నిరసన
సూర్య ప్రాంతీయ డెస్క్: నాగర్‌కర్నూల్ జిల్లాలో నేషనల్ హెల్త్ మిషన్ (ఎన్‌హెచ్‌ఎం) కాంట్రాక్ట్, అవుట్‌సోర్సింగ్ ఉద్యోగులు చేపడుతున్న నిరవధిక సమ్మె ఆదివారంతో 20వ రోజుకు చేరుకుంది. తమ సమన్యాయమైన డిమాండ్లను నెరవేర్చాలని కోరుతూ ఉద్యోగులు కార్లు శుభ్రం చేస్తూ వినూత్న రీతిలో నిరసన తెలిపారు. కోవిడ్ క్లిష్ట సమయంలో తమ ప్రాణాలను సైతం లెక్కచేయకుండా ప్రజలకు వైద్య సేవలందించి వేలాది మంది ప్రాణాలను కాపాడిన తమ చేతులకు, నేడు ఉద్యోగ భద్రత కరువై కుటుంబాలను పోషించుకోవడం భారంగా మారిందని ఉద్యోగులు తీవ్ర ఆవేదన వ్యక్తం చేశారు. ప్రభుత్వ ఆరోగ్య కార్యక్రమాల విజయవంతమైన అమలులో తాము కీలక పాత్ర పోషిస్తున్నప్పటికీ, తమ సేవలకు సరైన గుర్తింపు లభించడం లేదని ఆందోళన చెందారు.
ఈ సందర్భంగా ఎన్‌హెచ్‌ఎం జేఏసీ నాయకులు మాట్లాడుతూ.. ఎన్‌హెచ్‌ఎం పరిధిలోని 78 కేడర్లలో పనిచేస్తున్న ఉద్యోగులందరినీ క్రమబద్ధీకరించడమే తమ ప్రధాన డిమాండ్ అని స్పష్టం చేశారు. సుప్రీంకోర్టు తీర్పు ప్రకారం 'సమాన పనికి సమాన వేతనం' సూత్రాన్ని తక్షణమే అమలు చేయాలని డిమాండ్ చేశారు. ఉద్యోగ భద్రత లేకపోవడం వల్ల పిల్లల చదువులు, కుటుంబ పోషణ మరియు వైద్య ఖర్చులు మోయలేని భరంగా మారాయని వాపోయారు. 20 రోజులుగా శాంతియుత మార్గంలో నిరసనలు తెలుపుతున్నప్పటికీ ప్రభుత్వ యంత్రాంగం నుంచి ఎలాంటి స్పందన రాకపోవడం శోచనీయమని విమర్శించారు.
ముఖ్యమంత్రి, రాష్ట్ర వైద్య ఆరోగ్యశాఖ మంత్రి తక్షణమే స్పందించి ఎన్‌హెచ్‌ఎం జేఏసీ ప్రతినిధులను చర్చలకు ఆహ్వానించాలని నాయకులు విజ్ఞప్తి చేశారు. ప్రభుత్వం తమ పట్ల జాలి చూపాల్సిన అవసరం లేదని, తాము అందించిన సుదీర్ఘ సేవలను గుర్తించి న్యాయమైన ఉద్యోగ భద్రతను కల్పించాలని కోరారు. 78 కేడర్ల ఉద్యోగులను క్రమబద్ధీకరించి తమ కుటుంబాలకు భరోసా కల్పించేంత వరకు శాంతియుత పోరాటాన్ని కొనసాగిస్తామని స్పష్టం చేశారు. ఈ వినూత్న నిరసన కార్యక్రమంలో ఎన్‌హెచ్‌ఎం జేఏసీ నాయకులు, జిల్లా వివిధ ప్రాంతాల నుంచి వచ్చిన ఉద్యోగులు పెద్ద సంఖ్యలో పాల్గొన్నారు.
