telangana
పేదల వైద్యానికి నీలిమ హాస్పిటల్ భరోసా కల్పిస్తోంది : మాజీ చైర్మన్ బోయపల్లి కొండల్ రెడ్డి
ఘట్‌కేసర్ రూరల్, మేజర్ న్యూస్ : పేద, మధ్యతరగతి ప్రజలకు మెరుగైన వైద్య సేవలు అందించేందుకు నీలిమ హాస్పిటల్ యాజమాన్యం చేస్తున్న కృషి అభినందనీయమని మాజీ మున్సిపల్ చైర్మన్ బోయపల్లి కొండల్ రెడ్డి అన్నారు. మల్కాజిగిరి మున్సిపల్ కార్పొరేషన్ ఘట్‌కేసర్ సర్కిల్ పోచారం డివిజన్ పరిధిలోని అన్నోజిగూడ రాజీవ్ గృహకల్పలో ఆదివారం డివిజన్ బీఆర్ఎస్ యువజన అధ్యక్షుడు కొమ్ముల ప్రశాంత్ ఆధ్వర్యంలో నీలిమ హాస్పిటల్ సౌజన్యంతో నిర్వహించిన ఉచిత వైద్య శిబిరంలో ఆయన పాల్గొన్నారు. ఈ సందర్భంగా కొండల్ రెడ్డి మాట్లాడుతూ.. పేదలకు 50 శాతం రాయితీతో వైద్య కార్డులు, ప్రతి నెల 9వ తేదీన గర్భిణులకు ఉచిత వైద్య కార్డులు అందించడం ద్వారా నీలిమ హాస్పిటల్ ప్రజలకు వైద్య సేవలను చేరువ చేస్తోందన్నారు. ఈ సేవా కార్యక్రమాలకు సహకరిస్తున్న జనగామ ఎమ్మెల్యే పల్లా రాజేశ్వర్ రెడ్డికి డివిజన్ ప్రజల తరఫున ప్రత్యేక కృతజ్ఞతలు తెలిపారు. ఆర్థిక ఇబ్బందులతో వైద్యానికి దూరమయ్యే పేదలకు ఇలాంటి శిబిరాలు ఎంతో ఉపయోగకరమని పేర్కొన్నారు. ఈ శిబిరంలో వెయ్యి మందికి పైగా ప్రజలు వైద్య సేవలను వినియోగించుకున్నట్లు నీలిమ హాస్పిటల్ యాజమాన్యం వెల్లడించింది. ఈ కార్యక్రమంలో పోచారం మాజీ ఉపసర్పంచ్ ఆకిటి బాల్ రెడ్డి, రాష్ట్ర గిరిజన నాయకుడు జితేందర్ నాయక్, అబ్బవతిని నర్సింహ, కే.ఎం.రెడ్డి, బోయపల్లి రాజేశ్వర్ రెడ్డి, పాశం లక్ష్మణ్ యాదవ్, సతీష్, ఆసుపత్రి సిబ్బంది భారత్ రెడ్డి తదితరులు పాల్గొన్నారు.
