telangana
లైబ్రరీ నిర్వహణపై మాజీ జిల్లా విద్యాశాఖాధికారి ఎన్.వి. దుర్గాప్రసాద్ ప్రశంసలు
సూర్య వేల్పూరు : వేల్పూర్ మండలంలోని మోతె జిల్లా పరిషత్ ఉన్నత పాఠశాలలో నూతనంగా ఏర్పాటు చేసిన గ్రంథాలయాన్ని ఆదివారం నిజామాబాద్ మాజీ జిల్లా విద్యాశాఖాధికారి ఎన్.వి. దుర్గాప్రసాద్ ప్రత్యేకంగా సందర్శించారు. 2024 నవంబర్ వరకు నిజామాబాద్ జిల్లా విద్యాశాఖాధికారిగా పనిచేసిన ఆయన పాఠశాల గ్రంథాలయంలో కొంతసేపు గడిపి, అక్కడ అందుబాటులో ఉన్న వివిధ అంశాలకు సంబంధించిన పుస్తకాలను పరిశీలించారు.ఈ సందర్భంగా పాఠశాల ఆవరణను పరిశుభ్రంగా, ఆహ్లాదకరంగా నిర్వహించడం పట్ల సంతోషం వ్యక్తం చేశారు. విద్యార్థులు, ఉపాధ్యాయులకు ఉపయోగపడేలా వివిధ అంశాలకు సంబంధించిన పుస్తకాలను అందుబాటులో ఉంచడం అభినందనీయమని పేర్కొన్నారు. ఈ గ్రంథాలయం ప్రత్యేకమైనదని, దానిని విజయవంతంగా నిర్వహిస్తున్న తీరు ప్రశంసనీయమని తన అభిప్రాయాన్ని సందర్శకుల రిజిస్టర్లో నమోదు చేశారు.
గ్రంథాలయ ఏర్పాటుకు శ్రీకారం చుట్టి విద్యార్థులకు సహాయ సహకారాలు అందిస్తున్న దాత అల్లాపుల్ల గంగారెడ్డితో పాటు ఇతర దాతలకు ఆయన హృదయపూర్వక కృతజ్ఞతలు తెలిపారు. విద్యార్థుల అభిరుచులు, ఆసక్తులకు అనుగుణంగా వారిని తీర్చిదిద్దేందుకు ప్రధానోపాధ్యాయులు, ఉపాధ్యాయులు చేస్తున్న కృషిని అభినందించారు. భవిష్యత్తులో పాఠశాల మరింత అభివృద్ధి చెందాలని, విద్యార్థులు ఉన్నత శిఖరాలను అధిరోహించాలని ఆకాంక్షించారు.అనంతరం మాజీ డి ఈ ఓ ఎన్.వి. దుర్గాప్రసాద్ను పాఠశాల ప్రధానోపాధ్యాయులు, ఉపాధ్యాయులందరూ కలిసి శాలువాతో ఘనంగా సత్కరించి కృతజ్ఞతలు తెలిపారు. ఈ కార్యక్రమం పాఠశాల ఉపాధ్యాయుల్లో, విద్యార్థుల్లో ఆనందాన్ని నింపింది.