కేసీఆర్ హయాంలోనే తెలంగాణ రైతాంగానికి నిజమైన పండుగ

నిర్మల్, సూర్య ప్రతినిధి :నిర్మల్‌లో నిర్వహించిన బీఆర్ఎస్ ‘రైతు గర్జన’ బహిరంగ సభలో పార్టీ వర్కింగ్ ప్రెసిడెంట్ కేటీఆర్ పాల్గొని కాంగ్రెస్ ప్రభుత్వంపై తీవ్రస్థాయిలో ధ్వజమెత్తారు. ఈ సందర్భంగా ఆయన మాట్లాడుతూ, చావు నోట్లో తలపెట్టైనా తెలంగాణ తెస్తానన్న మాటను కేసీఆర్ నిలబెట్టుకున్నారని కొనియాడారు. సమైక్య రాష్ట్రంలో కరువు, ఆత్మహత్యలే ఉండేవని, కేసీఆర్ అధికారంలోకి వచ్చాక కాళేశ్వరం ప్రాజెక్టు నిర్మించి బీడు భూముల్లో సాగునీరు పారించారని తెలిపారు. తుమ్మలు మొలిచిన కాకతీయ SRSP కాలువల్లో నీళ్లు పారించిన ఘనత కేసీఆర్‌కే దక్కుతుందన్నారు. రైతుల కష్టం తెలిసిన ఏకైక నాయకుడు కేసీఆర్ అని, ఉచిత విద్యుత్, రైతుబంధు, రైతుభీమా ద్వారా వ్యవసాయాన్ని పండుగలా మార్చారని చెప్పారు. కానీ ప్రస్తుత కాంగ్రెస్ పాలనలో రైతులకు సాగునీరు, విద్యుత్, ఎరువుల కష్టాలు మళ్లీ మొదలయ్యాయని, ఇచ్చిన రుణమాఫీ, రైతు భరోసా హామీలను ప్రభుత్వం వెంటనే నెరవేర్చాలని కేటీఆర్ డిమాండ్ చేశారు.