కాలుష్య రహిత సమాజం కోసం చిన్నారుల బృహత్తర సంకల్పం.. గ్రీన్ వారియర్ అవార్డులతో సత్కారం!

నల్గొండ జిల్లా కట్టంగూరు మండలంలో మల్లార గ్రామంలో దీపావళికి టపాకాయలు కాల్చకుండా పర్యావరణంపై అవగాహన.. చిన్నారులను అభినందించిన సర్పంచి

కట్టంగూర్: పర్యావరణ పరిరక్షణ అనేది ప్రతి ఒక్కరి బాధ్యత అని నిరూపిస్తూ ఐదుగురు చిన్నారులు ఆదర్శంగా నిలిచారు. దీపావళి సందర్భంగా టపాకాయలు కాల్చడం వల్ల కలిగే కాలుష్యాన్ని గుర్తించి, తాము వాటికి దూరంగా ఉండటంతో పాటు ఇతరులకు కూడా అవగాహన కల్పించారు. వారి సేవలను గుర్తించిన స్థానిక ప్రజాప్రతినిధులు బాలల దినోత్సవం సందర్భంగా గ్రీన్ వారియర్ అవార్డులతో సత్కరించారు.

దండెంపల్లి లక్ష్మీ ప్రసన్న, పెద్ది అక్షర-అంకిత, పెద్ది మాన్విక్, చౌగోని అభిరామ్ అక్షయ, గాదగోని మనస్విలకు గ్రామ సర్పంచి పెద్ది నాగమణి మల్లేష్ గౌడ్ అవార్డులను అందజేశారు. చిన్న వయసులోనే పర్యావరణంపై బాధ్యతాయుతమైన ఆలోచన కలిగి ఉండటం అభినందనీయమన్నారు.

అనంతరం పాఠశాలలో స్మార్ట్ టీవీ ఏర్పాటు కోసం సర్పంచి రూ.5 వేల విరాళాన్ని అందజేశారు. ప్రకృతిని కాపాడితేనే భావితరాలకు ఆరోగ్యకరమైన భవిష్యత్తు అందించగలమని, చిన్నారుల స్ఫూర్తిని ప్రతి ఒక్కరూ ఆదర్శంగా తీసుకోవాలని ఆమె పిలుపునిచ్చారు.

ఈ కార్యక్రమంలో ఉపసర్పంచి దండెంపల్లి జగదీష్ గౌడ్, హెచ్‌ఎం సమ్మేటి తిరుమలేష్, వార్డు సభ్యులు, పంచాయతీ కార్యదర్శి రాజశేఖర్, అంగన్వాడీ టీచర్ చంద్రమ్మ, బొడ్రాయి చైర్మన్ చౌగోని లింగయ్య గౌడ్ తదితరులు పాల్గొన్నారు.