కాగజ్ నగర్ ఎక్సైజ్ కార్యాలయం ముందు బార్ యజమానులు , సిబ్బంది ధర్నా

సూర్య,  కాగజ్‌నగర్:పట్టణంలో బెల్టు షాపుల జోరు పెరుగుతుండటంపై ప్రజల్లో ఆందోళన వ్యక్తమవుతోంది. మద్యం విక్రయాల నియంత్రణపై అధికారులు కఠినంగా వ్యవహరించకపోవడంతో కుటుంబాల్లో కలహాలు, ఆర్థిక ఇబ్బందులు పెరిగే ప్రమాదం ఉందని పలువురు ఆవేదన వ్యక్తం చేస్తున్నారు. గతంలో మద్యం విక్రయాలను నియంత్రించాలని, తమ కుటుంబాలను కాపాడాలని మహిళలు పలుమార్లు ధర్నాలు, నిరసనలు చేసిన విషయాన్ని ప్రజలు గుర్తుచేస్తున్నారు. అయినప్పటికీ బెల్టు షాపులపై సమర్థవంతమైన చర్యలు కనిపించడం లేదని ప్రశ్నిస్తున్నారు.మరోవైపు, ప్రభుత్వానికి లక్షల రూపాయల లైసెన్సు ఫీజులు చెల్లించి నిబంధనల ప్రకారం బార్లు నిర్వహిస్తున్న యజమానులు గిరాకీ లేక ఇబ్బందులు ఎదుర్కొంటున్నామని చెబుతున్నారు. బెల్టు షాపుల్లో ఆహార పదార్థాల విక్రయాలు, కూర్చుని  దేశి, గుడుంబా, కల్తీ   మద్యం సేవించే ఏర్పాట్లు ఉన్నాయంటూ బార్ యజమానులు ఆరోపిస్తున్నారు. వైన్స్‌లో పర్మిట్ రూముల పేరుతో సిట్టింగ్ సౌకర్యాలు కొనసాగుతున్నా అధికారులు పట్టించుకోవడం లేదని, తమ విషయంలో మాత్రం ఆంక్షలు విధిస్తున్నారని ఆవేదన వ్యక్తం చేస్తున్నారు.ఈ నేపథ్యంలో మంగళవారం కాగజ్‌నగర్ ఎక్సైజ్ కార్యాలయం ఎదుట పట్టణంలోని మూడు బార్ల యజమానులు, కార్మికులు ధర్నా నిర్వహించారు. బార్ల సమస్యలను పరిష్కరించి, మద్యం విక్రయాల విషయంలో అందరికీ ఒకే విధమైన నిబంధనలు అమలు చేయాలని డిమాండ్ చేశారు. తమ సమస్యలపై ఉన్నతాధికారులకు వినతిపత్రాలు అందించినా స్పందన లేదని, హైకోర్టును కూడా ఆశ్రయించినట్లు వారు తెలిపారు.