జవహర్‌నగర్‌ డంప్‌యార్డు తరలింపునకు పోరుబాట.. రెండో రోజు ఈటల రాజేందర్‌ పాదయాత్ర
ఘట్‌కేసర్‌, మేజర్‌ న్యూస్‌: జవహర్‌నగర్‌ డంప్‌యార్డును తరలించాలనే ప్రధాన డిమాండ్‌తో ఎంపీ ఈటల రాజేందర్‌, బీజేపీ నాయకులు చేపట్టిన 60 కిలోమీటర్ల పాదయాత్ర రెండో రోజు కొనసాగింది. నాలుగు రోజుల పాటు నిర్వహిస్తున్న ఈ పాదయాత్రను బుధవారం అన్నోజిగూడలో ప్రముఖ పర్యావరణవేత్త పురుషోత్తం రెడ్డి, బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌ గౌడ్‌ ప్రారంభించారు. అక్కడి నుంచి ఘట్‌కేసర్‌ వరకు యాత్ర సాగింది.జవహర్‌నగర్‌ డంప్‌యార్డు సమస్యను ప్రభుత్వం దృష్టికి తీసుకెళ్లి, దాని తరలింపునకు ఒత్తిడి తీసుకురావాలనే లక్ష్యంతో ఈ పాదయాత్ర చేపట్టారు. డంప్‌యార్డు తరలింపు డిమాండ్‌తో నాలుగు రోజుల పాటు ప్రజల్లోకి వెళ్లి తమ నిరసనను తెలియజేయనున్నారు. ఈ పాదయాత్రలో మాజీ ఎమ్మెల్యే, బీజేపీ సీనియర్‌ నాయకురాలు బోడిగ శోభ, బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌ గౌడ్‌, బీసీ కుల సంఘాల జేఏసీ చైర్మన్‌ కుందారం గణేశ్‌ చారి తదితరులు పాల్గొన్నారు.
