నాగేపల్లి–గుడిబండ ప్రధాన రహదారిపై తాగునీటి పైపులైన్ లీకేజీ

గుడిబండ మండలంలోని నాగేపల్లి నుంచి గుడిబండకు వెళ్లే ప్రధాన రహదారి మధ్యలో తుంగభద్ర తాగునీటి పైపులైన్ లీకేజీ కావడంతో ప్రయాణికులు తీవ్ర ఇబ్బందులు ఎదుర్కొంటున్నారు. రహదారి మధ్యలోనే నీరు అధికంగా ప్రవహిస్తుండటంతో రోడ్డు దెబ్బతిని గుంతలు ఏర్పడే ప్రమాదం ఉందని స్థానికులు ఆందోళన వ్యక్తం చేస్తున్నారు.
ఈ మార్గం గుండా నిత్యం రాకపోకలు సాగించే ద్విచక్ర వాహనదారులు, ఇతర వాహనదారులు లీకేజీ నీటి కారణంగా ఇబ్బందులు పడుతున్నారు. ముఖ్యంగా సంత మార్కెట్‌కు వెళ్లే రైతులు, వ్యాపారులు, ప్రయాణికులు ఈ సమస్యతో అవస్థలు ఎదుర్కొంటున్నారు. రహదారి మధ్యలో నీరు ప్రవహిస్తుండటంతో ఎప్పుడు ప్రమాదం జరుగుతుందోనని వాహనదారులు భయాందోళనకు గురవుతున్నారు.పైపులైన్ నుంచి నీరు నిరంతరం లీకేజీ కావడం వల్ల రహదారి కింద ఉన్న మట్టి బలహీనపడి రోడ్డు కుంగిపోయే అవకాశం ఉందని స్థానికులు ఆందోళన చెందుతున్నారు. అధికారులు నిర్లక్ష్యం చేయకుండా తక్షణమే స్పందించి లీకేజీని అరికట్టడంతోపాటు పైపులైన్‌కు మరమ్మతులు చేపట్టి, రహదారికి ఎలాంటి నష్టం జరగకుండా చర్యలు తీసుకోవాలని కోరుతున్నారు.
ప్రయాణికులు, వాహనదారులు, రైతులు, స్థానిక ప్రజల భద్రతను దృష్టిలో ఉంచుకుని సంబంధిత అధికారులు వెంటనే స్పందించి సమస్యను పరిష్కరించాలని ప్రజలు విజ్ఞప్తి చేస్తున్నారు.

గుడిబండ రిపోర్టర్ దేవరాజు