అర్నబ్ తుపాను నేపథ్యంలో ఎన్టీఆర్ జిల్లా యంత్రాంగం అప్రమత్తం

విజయవాడ, మేజర్ న్యూస్: అర్నబ్ తుపాను ప్రభావం నేపథ్యంలో ఎన్టీఆర్ జిల్లా వ్యాప్తంగా అధికార యంత్రాంగం అప్రమత్తంగా ఉండాలని జిల్లా కలెక్టర్ డాక్టర్ జి. లక్ష్మీశ ఆదేశించారు. తుపాను తీరం దాటే ప్రక్రియ కొనసాగుతున్న నేపథ్యంలో బలమైన ఈదురుగాలులు, భారీ వర్షాలు కురిసే అవకాశం ఉన్నందున ప్రజలు అప్రమత్తంగా ఉండాలని సూచించారు. కమాండ్ కంట్రోల్ రూమ్ ద్వారా పరిస్థితులను ఎప్పటికప్పుడు సమీక్షిస్తూ సహాయక చర్యలను పర్యవేక్షిస్తున్నారు. లోతట్టు, కొండ ప్రాంతాల ప్రజల రక్షణకు పునరావాస కేంద్రాలను సిద్ధంగా ఉంచాలని, అక్కడ ఆహారం, తాగునీరు, ఇతర మౌలిక సదుపాయాలు కల్పించాలని అధికారులను ఆదేశించారు. చెట్లు విరిగిపడినా, విద్యుత్ స్తంభాలు నేలకొరిగినా, రహదారులు బ్లాక్ అయినా వెంటనే పునరుద్ధరణ చర్యలు చేపట్టాలని, విద్యుత్, తాగునీరు, రవాణాకు అంతరాయం కలగకుండా చూడాలని స్పష్టం చేశారు. వైద్య సిబ్బంది 24 గంటలూ అందుబాటులో ఉండాలని, అత్యవసర వైద్య సేవలు, గర్భిణుల సంరక్షణపై ప్రత్యేక దృష్టి సారించాలని సూచించారు. తుపాను ప్రభావం తగ్గినప్పటికీ భారీ వర్షాల నేపథ్యంలో నగరంతో పాటు జిల్లా వ్యాప్తంగా ప్రధాన రహదారులు, లోతట్టు ప్రాంతాల్లో నిలిచిన వర్షపు నీటిని యంత్రాల సహాయంతో వెంటనే తొలగించాలని, కాలువల్లో పూడిక తీసి నీటి ప్రవాహానికి ఆటంకాలు లేకుండా చూడాలని ఆదేశించారు. ప్రమాదకర చెట్ల కొమ్మలను తొలగించడంతో పాటు తుపాను ప్రభావిత ప్రాంతాల్లో సహాయక చర్యలు కొనసాగించాలని సూచించారు. క్షేత్రస్థాయి సమాచారాన్ని వెంటనే నమోదు చేయాలని, విధుల్లో నిర్లక్ష్యం వహించే సిబ్బందిపై క్రమశిక్షణా చర్యలు తీసుకుంటామని హెచ్చరించారు. ముఖ్యమంత్రి నారా చంద్రబాబు నాయుడు ఆదేశాల మేరకు సహాయక చర్యలపై నిరంతర పర్యవేక్షణ కొనసాగుతోందని, తుపాను ప్రభావం పూర్తిగా తగ్గేవరకు అధికారులు, సిబ్బంది క్షేత్రస్థాయిలో అప్రమత్తంగా ఉండాలని కలెక్టర్ స్పష్టం చేశారు. ప్రజలు జాగ్రత్తగా ఉంటూ అధికారులకు సహకరించాలని జిల్లా యంత్రాంగం విజ్ఞప్తి చేసింది.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.