మంత్రి పదవిపై ఉన్న శ్రద్ధ.. నియోజకవర్గ అభివృద్ధిపై లేదు

శివన్నగూడెం, రాచకొండ ప్రాజెక్టుల కోసం పార్టీలకతీతంగా పోరాడాలి: చలమల కృష్ణారెడ్డి

సంస్థాన్‌ నారాయణపురం మేజర్ న్యూస్: ఎమ్మెల్యే కోమటిరెడ్డి రాజగోపాల్‌రెడ్డికి మంత్రి పదవిపై ఉన్న చిత్తశుద్ధి మునుగోడు నియోజకవర్గ అభివృద్ధిపై లేదని కాంగ్రెస్‌ నేత చలమల కృష్ణారెడ్డి విమర్శించారు. బుధవారం నారాయణపురం మండలం రాజన్నబావిలో సొంత నిధులతో చేపట్టనున్న రోడ్డు పనులకు ఆయన శంకుస్థాపన చేశారు. ఈ సందర్భంగా ఆయన మాట్లాడుతూ శివన్నగూడెం, రాచకొండ ప్రాజెక్టులను సాధించేందుకు పార్టీలకు అతీతంగా ప్రజలంతా ఐక్యంగా పోరాడాలని పిలుపునిచ్చారు. సాగునీటి ప్రాజెక్టులపై ప్రభుత్వం దృష్టి సారించేలా సంబంధిత మంత్రులను నియోజకవర్గానికి ఆహ్వానించాలని సూచించారు. కార్యకర్తలకు ఎల్లప్పుడూ అందుబాటులో ఉంటానని, గడపగడపకు వెళ్లి ప్రజల సమస్యలను తెలుసుకుని పరిష్కారానికి కృషి చేస్తానని తెలిపారు.