జర్నలిస్ట్ కాలనీలో వైభవంగా సంకటహర చతుర్థి పూజలు

 నిజాంపేట్ మేజర్ న్యూస్ జర్నలిస్ట్ కాలనీలోని శ్రీ లక్ష్మీ గణపతి దేవస్థానంలో సంకటహర చతుర్థి సందర్భంగా శుక్రవారం మహాగణపతికి ప్రత్యేక పూజలు నిర్వహించారు. ఆలయ పూజారి రాకేష్ పంతులు దేవస్థానం గణేష్ ఉత్సవ కమిటీ సభ్యులతో కలిసి స్వామివారికి పంచామృతాలతో అభిషేకాలు నిర్వహించి, పుష్పాలు, గరికతో అలంకరించి భక్తిశ్రద్ధలతో పూజలు చేశారు. అనంతరం హారతులు సమర్పించి భక్తులకు తీర్థప్రసాదాలు పంపిణీ చేశారు. ఈ సందర్భంగా కాలనీలోని ప్రజలందరూ సుఖసంతోషాలతో, ఆయురారోగ్యాలు, అష్టైశ్వర్యాలతో వర్ధిల్లాలని మహాగణపతిని ప్రార్థించినట్లు తెలిపారు. స్వామివారి ఆశీస్సులు అందరిపై ఉండాలని ఆకాంక్షించారు. ఈ పూజా కార్యక్రమంలో గణేష్ ఉత్సవ కమిటీ సభ్యులు గోవిందరావు, ముక్క దేవేందర్ గుప్తా, దామెర జగదీశ్వర్ గుప్తా, మల్లికార్జున్, బంటి, మహిళా సభ్యులు, కాలనీ ప్రజలు, మహిళలు, భక్తులు పెద్ద సంఖ్యలో పాల్గొన్నారు.