జగద్గురువుల దర్శనానికి సర్వం సిద్ధం - ఏర్పాట్లను పరిశీలించిన ఎమ్మెల్యే హరీష్ బాబు

సూర్య,కాగజ్‌నగర్:  కొమరం భీం ఆసిఫాబాద్ జిల్లా కాగజ్ నగర్ పట్టణంలోని సిర్పూర్ పేపర్ మిల్లు మైదానంలో ఈ నెల 16వ తేదీ సోమవారం జగద్గురువులు శ్రీశ్రీశ్రీ నరేంద్రాచార్య స్వామివారి దర్శన కార్యక్రమం జరగనున్న నేపథ్యంలో సభా ప్రాంగణం, మండపం, దర్శన ఏర్పాట్లను సిర్పూర్ ఎమ్మెల్యే డా. పాల్వాయి హరీష్ బాబు కాగజ్‌నగర్ డీఎస్పీ వహిదుద్దీన్‌తో కలిసి పరిశీలించారు.ఈ సందర్భంగా ఎమ్మెల్యే మాట్లాడుతూ.. సద్గురువుల దర్శనం, ఆశీస్సులు పొందేందుకు సిర్పూర్ నియోజకవర్గంతో పాటు ఆసిఫాబాద్ జిల్లా, మహారాష్ట్ర నుంచి పెద్ద సంఖ్యలో భక్తులు తరలివచ్చే అవకాశం ఉందన్నారు. భక్తులకు ఎలాంటి అసౌకర్యం కలగకుండా దర్శన ఏర్పాట్లు, వాహనాల పార్కింగ్, ఇతర మౌలిక సదుపాయాలు కల్పిస్తున్నట్లు తెలిపారు. జగద్గురువుల అమృత వాక్కులు వినడంతో పాటు వారి దివ్య ఆశీస్సులు పొందేందుకు భక్తులు అధిక సంఖ్యలో తరలిరావాలని కోరారు.ఈ కార్యక్రమంలో రూరల్ సీఐ కుమారస్వామి, టౌన్ ఎస్ఐ వెంకన్న గౌడ్, పీఠ నిర్వాహకులు, భక్తులు పాల్గొన్నారు.