ఇంటర్ బోర్డు విలీన నిర్ణయాన్ని వెనక్కి తీసుకోవాలి-టీ ఆర్ ఎస్ అధికార ప్రతినిధి సిద్ధంశెట్టి సాజన్

సూర్య మంచిర్యాల: ఇంటర్మీడియట్ విద్యను పాఠశాల విద్యాశాఖలో విలీనం చేయాలన్న ప్రభుత్వ నిర్ణయాన్ని వెంటనే ఉపసంహరించుకోవాలని తెలంగాణ రక్షణ సేన రాష్ట్ర అధికార ప్రతినిధి సిద్ధంశెట్టి సాజన్ డిమాండ్ చేశారు.శనివారం మీడియా సమావేశంలో ఆయన మాట్లాడుతూ.. విద్యావ్యవస్థలో మార్పులు తీసుకొచ్చే ముందు విద్యార్థులు, తల్లిదండ్రులు,అధ్యాపకులు, విద్యావేత్తలతో చర్చించాలని సూచించారు.ప్రభుత్వం ఏకపక్ష నిర్ణయాలతో వేలాది జూనియర్ కళాశాలలు, లక్షలాది మంది విద్యార్థుల భవిష్యత్తును ప్రభావితం చేయవద్దన్నారు. పదో తరగతి తర్వాత 40 శాతం మంది విద్యార్థులు చదువుకు దూరమవుతున్నారన్న గణాంకాలపై శ్వేతపత్రం విడుదల చేయాలని డిమాండ్ చేశారు. ఇంటర్ విద్యకు అవసరమైన అధ్యాపకులు, ప్రయోగశాలలు, మౌలిక సదుపాయాలపై ప్రభుత్వం స్పష్టత ఇవ్వాలన్నారు.కర్పొరేట్ విద్యాసంస్థలకు ప్రయోజనం కలిగించే విధానాలను ప్రభుత్వం ప్రోత్సహించకూడదని పేర్కొన్నారు. కరువు పరిస్థితులను దృష్టిలో ఉంచుకొని ప్రైవేట్ విద్యాసంస్థల్లోనూ ఉచిత విద్య అమలు చేయాలని, విద్యార్థుల ఫీజుల భారాన్ని ప్రభుత్వమే భరించేలా ప్రత్యేక నిధులు కేటాయించాలని సాజన్ కోరారు.