ఇందిరమ్మ ఇంట్లో సీఎం రేవంత్ రెడ్డి దీపావళి సంబరాలు
కొడంగల్: ఒకవైపు దీపావళి పర్వదినం, మరోవైపు జన్మదినం.. ఈ రెండు పవిత్ర సందర్భాలను పురస్కరించుకుని తెలంగాణ ముఖ్యమంత్రి శ్రీ ఎ. రేవంత్ రెడ్డి ప్రజాక్షేత్రంలో వినూత్నంగా వేడుకలు నిర్వహించారు. వికారాబాద్ జిల్లా కొడంగల్ మండలం పర్సాపూర్ గ్రామంలో గోరిపల్లి సుమిత్ర-శ్రీనివాస్ దంపతులు నూతనంగా నిర్మించుకున్న ఇందిరమ్మ భవనాన్ని ముఖ్యమంత్రి ఆదివారం ప్రారంభించారు.
ఈ సందర్భంగా లబ్ధిదారులైన దంపతులకు సీఎం రేవంత్ రెడ్డి నూతన వస్త్రాలను అందజేశారు. అనంతరం లబ్ధిదారుని గృహంలోనే ప్రభుత్వం సరఫరా చేస్తున్న సన్నబియ్యంతో సిద్ధం చేసిన విందును స్వీకరించారు. ముఖ్యమంత్రితో పాటు శాసనసభ స్పీకర్ గడ్డం ప్రసాద్ కుమార్, రాష్ట్ర మంత్రులు దామోదర రాజనర్సింహ, జూపల్లి కృష్ణారావు, ధనసరి అనసూయ (సీతక్క), పార్లమెంట్ సభ్యులు వేం నరేందర్ రెడ్డి, పలువురు శాసనసభ్యులు ఈ భోజన కార్యక్రమంలో పాల్గొన్నారు.
విందు అనంతరం "మా ఇందిరమ్మ ఇంట్లో దీపావళి" పేరిట నిర్వహించిన కార్యక్రమంలో సీఎం రేవంత్ రెడ్డి ఉత్సాహంగా పాల్గొన్నారు. స్థానిక చిన్నారులతో కలిసి ఆయన బాణసంచా కాల్చి పండుగ శుభాకాంక్షలు తెలిపారు. ఈ సందర్భంగా హాజరైన పిల్లలందరికీ ముఖ్యమంత్రి స్వయంగా కలములను (పెన్నులను) బహుమతిగా అందించి అభినందించారు.
