గుడి నిర్మాణాన్ని అడ్డుకోవడం సరికాదు!

సంగారెడ్డి, : గడ్డపోతారం మున్సిపాలిటీ పరిధిలోని గడ్డపోతారం గ్రామంలో నిర్మిస్తున్న అయ్యప్ప స్వామి దేవాలయ నిర్మాణ పనులను అధికారులు నిలిపివేయడంపై కాంగ్రెస్ పార్టీ పటాన్‌చెరు నియోజకవర్గ ఇంచార్జ్ కాట శ్రీనివాస్ గౌడ్ తీవ్ర అసహనం వ్యక్తం చేశారు. ఆలయ నిర్మాణ పనులను నిలిపివేయడం సరికాదని స్పష్టం చేశారు.ఈ మేరకు ఆయన సంఘటన స్థలాన్ని క్షేత్రస్థాయిలో పరిశీలించి, స్థానికులు, ఆలయ నిర్వాహకులతో మాట్లాడి సమస్యకు సంబంధించిన వివరాలను తెలుసుకున్నారు. గ్రామ ప్రజల ఆధ్యాత్మిక విశ్వాసాలకు సంబంధించిన ఆలయ నిర్మాణ పనులను అధికారులు అర్ధంతరంగా నిలిపివేయడంపై ఆరా తీశారు.అనంతరం మున్సిపల్ కమిషనర్‌తో ఫోన్‌లో మాట్లాడిన కాట శ్రీనివాస్ గౌడ్.. గ్రామ ప్రజలందరికీ ఉపయోగపడే విధంగా అయ్యప్ప స్వామి దేవాలయ నిర్మాణం చేపడుతుంటే పనులను నిలిపివేయడం ఏమాత్రం సమంజసం కాదని పేర్కొన్నారు. గతంలో గ్రామ పంచాయతీ ఆమోదించిన తీర్మానాలు, అనుమతి పత్రాలు స్పష్టంగా ఉన్నప్పటికీ అధికారులు అనవసరంగా ఇబ్బందులకు గురిచేయడం తగదన్నారు.

భక్తుల మనోభావాలను గౌరవించాలి

ఆలయ నిర్మాణ పనులను నిలిపివేయడం వల్ల భక్తుల మనోభావాలు దెబ్బతింటాయని పేర్కొంటూ, సంబంధిత అధికారులు సమస్యను సానుకూలంగా పరిశీలించాలని కోరారు. తక్షణమే గుడి నిర్మాణ పనులు తిరిగి కొనసాగించేలా అవసరమైన చర్యలు తీసుకోవాలని మున్సిపల్ కమిషనర్‌కు సూచించారు.