ఎండిపోయిన ఎనిమిది ఎకరాల వరి పంట.. రైతు ఆవేదన

రామాయంపేట;నిజాంపేట మండల పరిధిలోని నార్లాపూర్ గ్రామానికి చెందిన మాజీ మార్కెట్ కమిటీ చైర్మన్ అమరాసేనారెడ్డి సాగు చేసిన వరి పంటలో ఎనిమిది ఎకరాల పంట ఎండిపోవడంతో ఆయన ఆవేదన వ్యక్తం చేస్తున్నారు. తనకున్న 18 ఎకరాల్లో వరి పంట సాగు చేయగా, వర్షాలు సకాలంలో కురవకపోవడం, ఎల్‌నినో ప్రభావంతో పాటు విద్యుత్ సరఫరా సక్రమంగా లేకపోవడంతో ఎనిమిది ఎకరాల పంట ఎండిపోయిందని తెలిపారు.వాతావరణ పరిస్థితులు అనుకూలించక, విద్యుత్ సరఫరాలో అంతరాయాల కారణంగా రైతులు తీవ్రంగా నష్టపోతున్నారని ఆవేదన వ్యక్తం చేశారు. ఇప్పటికే సాగు కోసం పెట్టుబడులు పెట్టిన రైతులకు పంటలు ఎండిపోవడం ఆర్థిక భారంగా మారిందన్నారు. రాష్ట్ర ప్రభుత్వం ఇప్పటికైనా స్పందించి, పంటలు ఎండిపోయి నష్టపోయిన రైతులను గుర్తించి, వారికి తగిన నష్టపరిహారం అందించేలా చర్యలు తీసుకోవాలని అమరాసేనారెడ్డి కోరారు.