ఎల్‌నినో ప్రభావంతో నష్టపోయే రైతులు, రైతు కూలీలను ఆదుకోవాలి
ఎల్‌నినో ప్రభావంతో నష్టపోయే రైతులు, రైతు కూలీలను ఆదుకోవాలి
కరువు మండలాల సంఖ్య పెంచాలి – ఎకరాకు రూ.20 వేల పరిహారం అందించాలి
తెలుగుదేశం పార్టీ నాయకులు పోగుల సైదులు గౌడ్
మిర్యాలగూడ అర్బన్, మేజర్ న్యూస్ :తెలంగాణ రాష్ట్రంలో ఎల్‌నినో ప్రభావంతో కరువు పరిస్థితులు ఏర్పడే అవకాశం ఉన్నందున ప్రభుత్వం ముందస్తు చర్యలు చేపట్టి రైతులను, రైతు కూలీలను ఆదుకోవాలని తెలుగుదేశం పార్టీ నాయకులు పోగుల సైదులు గౌడ్ డిమాండ్ చేశారు.
రాష్ట్రంలో కరువు పరిస్థితులను దృష్టిలో ఉంచుకుని కరువు మండలాల సంఖ్యను పెంచాలని, నష్టపోయే రైతులు, రైతు కూలీలకు అండగా నిలిచేందుకు ప్రత్యేక ఆర్థిక ప్యాకేజీ ప్రకటించాలని కోరారు. ప్రభుత్వం యాసంగి పంటలు సాగు చేయవద్దని సూచిస్తే, పంటలు వేయకుండా నష్టపోయే రైతులకు ఎకరాకు రూ.20 వేల చొప్పున పరిహారం అందించాలని డిమాండ్ చేశారు.
రైతుబంధు పథకంతో సంబంధం లేకుండా రైతులకు, రైతు కూలీలకు ప్రత్యేకంగా ఆర్థిక సహాయం అందించాలని విజ్ఞప్తి చేశారు. కరువు పరిస్థితులపై చర్చించేందుకు అఖిలపక్ష నాయకులను ఢిల్లీకి తీసుకెళ్లి, సమస్యలను ప్రధానమంత్రి దృష్టికి తీసుకెళ్లేలా ముఖ్యమంత్రి చొరవ చూపాలని సూచించారు. రైతులకు ఎలాంటి నష్టం జరగకుండా ప్రభుత్వం ఇప్పటి నుంచే పటిష్టమైన ముందస్తు చర్యలు చేపట్టాలని పోగుల సైదులు గౌడ్ కోరారు.
ఈ కార్యక్రమంలో తెలంగాణ తెలుగుదేశం పార్టీ బీసీ విభాగం మాజీ రాష్ట్ర కార్యనిర్వాహక కార్యదర్శి గంధం శ్రీనివాస్, మాజీ నల్లగొండ పార్లమెంట్ మైనార్టీ సెల్ అధ్యక్షులు ఎండీ జానిమియా, మైనార్టీ సెల్ పార్లమెంట్ కోశాధికారి షేక్ సయ్యద్ తదితరులు పాల్గొన్నారు.
