ఎల్‌నినో ప్రభావాలను ఎదుర్కొనేందుకు పంటల మార్పిడిపై అవగాహన
కొల్చారం ..ఎల్‌నినో ప్రభావాల నేపథ్యంలో పంటల మార్పిడి, నీటి సంరక్షణపై రైతులకు అవగాహన కల్పించేందుకు కొల్చారం మండలంలోని అంసాన్‌పల్లి, పోతిరెడ్డిపల్లి గ్రామాల్లో గ్రామసభలు నిర్వహించారు. ఈ సందర్భంగా రానున్న వర్షాకాల పరిస్థితులు, భూగర్భ జలమట్టం తగ్గుదల, ప్రత్యామ్నాయ పంటల సాగు, నీటి పొదుపు చర్యలపై రైతులకు అధికారులు వివరించారు.ఈ కార్యక్రమంలో మండల వ్యవసాయ అధికారి శ్వేతకుమారి మాట్లాడుతూ.. భూగర్భ జలమట్టం పరిస్థితులను దృష్టిలో ఉంచుకొని రైతులు తక్కువ నీటితో సాగయ్యే ప్రత్యామ్నాయ పంటలను ఎంచుకోవాలని సూచించారు. ముఖ్యంగా మొక్కజొన్న, జొన్న, పెసర, మినుము, అలసంద, పొద్దుతిరుగుడు, వేరుశనగ వంటి పంటల సాగుకు ప్రాధాన్యత ఇవ్వాలని తెలిపారు. అనుకూలమైన భూములు, నీటి వసతి ఉన్న ప్రాంతాల్లో ఆయిల్‌పామ్ సాగు చేపట్టి దీర్ఘకాలిక ఆదాయం పొందే అవకాశాలను పరిశీలించాలని సూచించారు.
వ్యవసాయ శాఖ అధికారులు రుతుపవనాల రాక, వర్షాల పరిస్థితులు, విత్తనాలు వేసేందుకు అనువైన సమయంపై అవగాహన కల్పించారు. నీటి లభ్యతను బట్టి ఆకుకూరలు, బెండ, గోరుచిక్కుడు వంటి కూరగాయలు సాగు చేయాలని, డ్రిప్ సౌకర్యం ఉన్న రైతులు టమాటా, మిరప, బీరకాయ, కాకరకాయ, సొరకాయ వంటి పంటలను సాగు చేసుకోవచ్చని వివరించారు.
డ్రిప్ ఇరిగేషన్ పథకం కింద ప్రభుత్వం అందిస్తున్న రాయితీలను వివరిస్తూ ఎస్సీ, ఎస్టీ రైతులకు 90 శాతం, చిన్న, సన్నకారు, బీసీ రైతులకు 80 శాతం, ఇతర రైతులకు 70 శాతం సబ్సిడీపై డ్రిప్ పరికరాలు అందుబాటులో ఉన్నాయని తెలిపారు.
ఏపీఓ మాట్లాడుతూ వి.బి.జి. రామ్ జీ పథకం ద్వారా గ్రామాల్లో నీటి సంరక్షణ, భూగర్భ జలాల పెంపునకు చేపట్టే పనులను వివరించారు. ప్రతి ఇంటి వద్ద ఇంకుడు గుంతలు నిర్మించుకోవడంతో పాటు గ్రామస్థాయిలో కమ్యూనిటీ సోక్‌పిట్స్ ఏర్పాటు చేసి వర్షపు నీటిని భూమిలోకి ఇంకేలా చర్యలు తీసుకోవాలని సూచించారు.
