telangana
దివ్యాంగ విద్యార్థులకు జిల్లా స్థాయి క్రీడా పోటీలు
శామీర్‌పేట, మేజర్ న్యూస్ : దివ్యాంగ విద్యార్థుల్లో దాగి ఉన్న క్రీడా ప్రతిభను వెలికితీసి, వారిలో ఆత్మవిశ్వాసం, పట్టుదలను పెంపొందించేందుకు జిల్లా స్థాయి క్రీడా పోటీలు దోహదపడతాయని మేడ్చల్ జిల్లా కోఆర్డినేటర్ హేమలత, మండల విద్యాధికారి కమలాకర్ అన్నారు. గురువారం మల్కాజిగిరి మున్సిపల్ కార్పొరేషన్ పరిధిలోని శామీర్‌పేట డివిజన్ హకీంపేట తెలంగాణ స్పోర్ట్స్ స్కూల్‌లో మేడ్చల్ జిల్లా దివ్యాంగ విద్యార్థులకు జిల్లా స్థాయి క్రీడా పోటీలు నిర్వహించారు.ఈ పోటీల్లో ప్రతిభ కనబరిచి విజయం సాధించిన విద్యార్థులకు అతిథులు బహుమతులు అందజేశారు. పోటీల్లో పాల్గొన్న విద్యార్థులందరికీ పార్టిసిపేషన్ సర్టిఫికెట్లు పంపిణీ చేశారు. ఈ సందర్భంగా వారు మాట్లాడుతూ విద్యార్థులు చదువుతోపాటు క్రీడల్లోనూ చురుగ్గా పాల్గొనాలని, ఆత్మవిశ్వాసం, పట్టుదలతో తమ ప్రతిభను చాటుకోవాలని సూచించారు. దివ్యాంగ విద్యార్థులకు తగిన ప్రోత్సాహం, అవకాశాలు కల్పిస్తే అన్ని రంగాల్లోనూ రాణించగలరని పేర్కొన్నారు.ఈ కార్యక్రమానికి విద్యార్థులు, తల్లిదండ్రులు కలిపి 160 మందికి పైగా హాజరయ్యారు. వివిధ మండలాలకు చెందిన ప్రత్యేక ఉపాధ్యాయులు శ్రీకాంత్ చారి, ఇతర ప్రత్యేక ఉపాధ్యాయులు, ఐఈఆర్‌పీలు పాల్గొన్నారు.
