telangana
శ్రీ సంజీవ స్వామి ఆలయ నిర్వహణ హక్కులపై వివాదం.. పార్థసారథి పిటిషన్‌పై మాజీ సర్పంచ్ అశోక్ రెడ్డి అభ్యంతరం
దోమ, మేజర్ న్యూస్: దోమ మండల పరిధిలోని దొంగ ఎన్కెపల్లి శ్రీ సంజీవ స్వామి దేవాలయ నిర్వహణ బాధ్యతలను పూర్తిగా తనకే అప్పగించాలని కోరుతూ సిద్ధాంతి పార్థసారథి ఎండోమెంట్ ట్రిబ్యునల్‌ను ఆశ్రయించడంపై దొంగ ఎన్కెపల్లి మాజీ సర్పంచ్ అశోక్ రెడ్డి, పరిగికి చెందిన హనుమాన్ భక్తులు అభ్యంతరం వ్యక్తం చేశారు. ఆలయ నిర్వహణ బాధ్యతలను తిరిగి ఆయనకు అప్పగించవద్దని వారు డిమాండ్ చేశారు.గతంలో ధర్మకర్తగా పనిచేసిన సమయంలో ఆలయానికి ఆశించిన ఆదాయం రాలేదని, 20 ఏళ్లుగా ఆలయాన్ని నిర్మిస్తానని చెప్పి గ్రామస్తులను మోసం చేశారని అశోక్ రెడ్డి ఆరోపించారు. పరిగిలోని సర్వే నంబర్ 383లో ఉన్న ఆలయ మాన్యం భూమి ఇతరుల పేర్లపైకి మారడానికి అప్పటి నిర్లక్ష్యమే కారణమని, ఆలయం శిథిలావస్థకు చేరిందని ఆయన విమర్శించారు.2019లో దేవాదాయ శాఖ కార్యనిర్వహణాధికారిని (ఈవో) నియమించిన తర్వాత మాన్యం భూముల వేలం ద్వారా వచ్చిన రూ.20 లక్షలకు పైగా నిధులు ఆలయ బ్యాంకు ఖాతాలో జమ అయ్యాయని తెలిపారు. ఆలయ నిర్వహణ బాధ్యతలను మళ్లీ పార్థసారథికి అప్పగిస్తే శ్రీ సంజీవ స్వామి దేవాలయం ఎదుట ఆమరణ నిరాహార దీక్ష చేపడతామని అశోక్ రెడ్డి, హనుమాన్ భక్తులు హెచ్చరించారు.పార్థసారథి దాఖలు చేసిన పిటిషన్‌పై దేవాదాయ శాఖ అధికారులు తగిన చర్యలు తీసుకోవాలని, ఆలయ భూములను పరిరక్షించేందుకు స్థానిక ఎమ్మెల్యే రామ్మోహన్ రెడ్డి చొరవ చూపాలని వారు విజ్ఞప్తి చేశారు.
