ఓట్ బచావ్–దేశ్ బచావ్ సభకు ఢిల్లీ చేరుకున్న తెలంగాణ కాంగ్రెస్ శ్రేణులు
సూర్యా వెబ్ డెస్క్: ఎస్‌ఐఆర్‌లో జరిగినట్లు కాంగ్రెస్ ఆరోపిస్తున్న అవకతవకలకు నిరసనగా, ‘ఓట్ బచావ్–దేశ్ బచావ్’ నినాదంతో ఏఐసీసీ ఆధ్వర్యంలో నేడు దేశ రాజధాని ఢిల్లీలోని రామ్‌లీలా మైదాన్‌లో భారీ బహిరంగ సభ నిర్వహించనున్నారు. ఈ కార్యక్రమానికి తెలంగాణ నుంచి పెద్ద సంఖ్యలో కాంగ్రెస్ పార్టీ శ్రేణులు ఢిల్లీకి చేరుకున్నాయి.
టీపీసీసీ ఆదేశాల మేరకు ఢిల్లీలోని తెలంగాణ భవన్‌కు చేరుకున్న తెలంగాణ కాంగ్రెస్ నాయకులు, కార్యకర్తలకు సభకు సంబంధించిన కార్యక్రమాలు, ఏర్పాట్లు, అనుసరించాల్సిన కార్యాచరణపై దిశానిర్దేశం చేసేందుకు ముఖ్యమంత్రి రేవంత్ రెడ్డి, టీపీసీసీ అధ్యక్షుడు మహేష్ కుమార్ గౌడ్ తెలంగాణ భవన్‌కు చేరుకున్నారు.
ఈ సందర్భంగా సీఎం రేవంత్ రెడ్డి, టీపీసీసీ అధ్యక్షుడు మహేష్ కుమార్ గౌడ్ పార్టీ నాయకులు, కార్యకర్తలతో సమావేశమై సభకు సంబంధించిన అంశాలపై చర్చించారు.
కార్యక్రమంలో శాసనసభ్యులు డా. పట్లోళ్ల సంజీవరెడ్డి, డీసీసీ అధ్యక్షుడు పట్లోళ్ల చంద్రశేఖర్ రెడ్డి, సహచర ఎంపీలు, ఎమ్మెల్యేలు, కాంగ్రెస్ పార్టీ నాయకులు, కార్యకర్తలు తదితరులు పాల్గొన్నారు.
ఢిల్లీలో జరగనున్న బహిరంగ సభకు తెలంగాణ నుంచి పెద్ద సంఖ్యలో పార్టీ శ్రేణులు హాజరవుతున్న నేపథ్యంలో తెలంగాణ భవన్ వద్ద సందడి నెలకొంది. సభలో ఎస్‌ఐఆర్‌కు సంబంధించిన అంశాలతో పాటు ఓటర్ల జాబితా, ప్రజాస్వామ్య ప్రక్రియకు సంబంధించిన అంశాలను కాంగ్రెస్ నాయకత్వం ప్రస్తావించనుంది.
