భక్తిశ్రద్ధలతో గోవర్ధన పూజ నిర్వహించిన శీర్వి సమాజ్ రాష్ట్ర అధ్యక్షుడు హంబాడ్ మోహన్ లాల్ చౌదరి

కీసర, మేజర్ న్యూస్: గోవర్ధన పూజను కీసరలో భక్తిశ్రద్ధలతో, సంప్రదాయబద్ధంగా నిర్వహించారు. తెలంగాణ రాష్ట్ర శీర్వి సమాజ్ అధ్యక్షుడు హంబాడ్ మోహన్ లాల్ చౌదరి తన నివాసంలో బుధవారం ప్రత్యేక పూజా కార్యక్రమాలు చేపట్టారు. శ్రీకృష్ణుడిని ఆరాధిస్తూ ప్రత్యేక పూజలు, ప్రార్థనలు నిర్వహించారు.ఈ సందర్భంగా హంబాడ్ మోహన్ లాల్ చౌదరి మాట్లాడుతూ… గోవర్ధన పూజ గోసంరక్షణ, ప్రకృతి పరిరక్షణ, పశుసంపద ప్రాముఖ్యతను చాటే పండుగ అని పేర్కొన్నారు. పురాణాల ప్రకారం శ్రీకృష్ణుడు గోవర్ధన పర్వతాన్ని తన చిటికెన వేలుపై ఎత్తి గోకుల ప్రజలను, పశువులను భారీ వర్షాల నుంచి రక్షించిన ఘట్టానికి గుర్తుగా దీపావళి అనంతరం ఈ పూజ నిర్వహించడం ఆనవాయితీగా వస్తోందన్నారు. గోవుల సంరక్షణతో పాడిపంటలు సమృద్ధిగా ఉంటాయని, ప్రకృతిని కాపాడుకోవడం ప్రతి ఒక్కరి బాధ్యత అని తెలిపారు. ప్రజలందరూ సుఖసంతోషాలు, ఆయురారోగ్యాలతో ఉండాలని, పాడిపంటలతో సమాజం సుభిక్షంగా వర్ధిల్లాలని ఆకాంక్షించారు.ఈ పూజా కార్యక్రమాల్లో శీర్వి సమాజ్ మహిళా అధ్యక్షురాలు హంబాడ్ సుగి దేవి, చందు లాల్ చౌదరి, ఉజ్వల చౌదరి, దివ్య చౌదరి తదితరులు పాల్గొన్నారు.