అనుమతుల్లేని బోర్లపై రెవెన్యూ శాఖ కొరడా!
కొండాపూర్‌ ; కొండాపూర్‌ మండల పరిధిలోని మమ్మ దా పూర్ శివారులోని 116వ సర్వే నంబర్‌లో ఉన్న అంకుర వెంచర్‌లో అనుమతులు లేకుండా వేసిన బోర్లను తహసీల్దార్‌ అశోక్‌ ఆధ్వర్యంలో సీజ్‌ చేశారు. ప్రస్తుత నీటి సంక్షోభం, కరువు పరిస్థితులను దృష్టిలో ఉంచుకుని జిల్లా కలెక్టర్‌, రెవెన్యూ డివిజనల్‌ అధికారి ఆదేశాల మేరకు ముందస్తు చర్యలు చేపట్టినట్లు తహసీల్దార్‌ తెలిపారు.ఈ సందర్భంగా తహసీల్దార్‌ అశోక్‌ మాట్లాడుతూ.. వ్యవసాయ క్షేత్రాలు, చెరువుల సమీపంలో కొత్త బోర్లు తవ్వకుండా ఆర్‌ఐలు, గ్రామ పాలనాధికారులు పర్యవేక్షించాలని ఆదేశించారు. వాల్టా చట్టం ప్రకారం అనుమతులు లేకుండా బోర్లు వేస్తే స్వాధీనం చేసుకోవాలని స్పష్టం చేశారు. ప్రజల తాగునీటి అవసరాలకు మాత్రమే సంబంధిత అనుమతులతో బోర్లు వేయాలని సూచించారు. విధుల నిర్వహణలో నిర్లక్ష్యం వహిస్తే తీవ్రంగా పరిగణిస్తామని హెచ్చరించారు.ఈ కార్యక్రమంలో ఆర్‌ఐ మల్లేశం, జీపీఓలు రమేష్‌, పాండు, రెవెన్యూ సిబ్బంది పాల్గొన్నారు.
